ഹൈദരാബാദ്: തെലങ്കാന സര്‍ക്കാരിനെ അട്ടിമറിക്കാനുള്ള നീക്കവുമായി ബി.ജെ.പി. ഇതിനായി ടി.ആര്‍എസ് എം.എല്‍.എമാര്‍ക്ക് കോടികള്‍ വാഗ്ദാനം ചെയ്തതായി റിപ്പോര്‍ട്ടുകള്‍ പറയുന്നു. ബി.ജെ.പിയില്‍ ചേരാന്‍ നിര്‍ബന്ധിക്കുന്നെന്ന് ആരോപിച്ച് ടി.ആര്‍.എസ് എം.എല്‍.എമാര്‍ രംഗത്തെത്തി. ടി.ആര്‍.എസില്‍ നിന്ന് ബി.ജെ.പിയിലേക്ക് മാറാന്‍ 100 കോടിയോളം വാഗ്ദാനം ചെയ്‌തെന്ന് എം.എല്‍.എമാര്‍ പൊലിസിനെ അറിയിച്ചു.

എം.എല്‍.എമാരുടെ പരാതിയുടെ അടിസ്ഥാനത്തില്‍ ബി.ജെ.പി ബന്ധമുള്ള നാല് പേരെ പൊലിസ് അറസ്റ്റ് ചെയ്തു. ഹരിയാനയിലെ ഫരീദാബാദില്‍ നിന്നുള്ള പുരോഹിതന്‍ രാമചന്ദ്ര ഭാരതി എന്ന സതീഷ് ശര്‍മ്മ, തിരുപ്പതിയില്‍ നിന്നുള്ള ദര്‍ശകന്‍ ഡി. സിംഹയാജി, വ്യവസായി നന്ദകുമാര്‍ എന്നിവരെയാണ് കസ്റ്റഡിയിലെടുത്തത്. മൊയ്‌നാബാദിലെ അസീസ് നഗറില്‍ തന്തൂര്‍ എം.എല്‍.എ രോഹിത് റെഡ്ഡിയുടെ ഉടമസ്ഥതയിലുള്ള ഫാം ഹൗസില്‍ നടത്തിയ പരിശോധനയിലാണ് പൊലിസ് ഇവരെ അറസ്റ്റ് ചെയ്തത്. പൊലിസ് പരിശോധനയില്‍ അറസ്റ്റിലായവരില്‍ നിന്ന് വന്‍ തുക കണ്ടെത്തിയിട്ടുണ്ട്.

കസ്റ്റഡിയിലെടുത്തവര്‍ വ്യാജ ഐഡന്റിറ്റി ഉപയോഗിച്ചാണ് ഹൈദരാബാദില്‍ എത്തിയതെന്ന് പൊലിസ് കണ്ടെത്തിയിട്ടുണ്ട്. സംഭവത്തില്‍ അന്വേഷണം പുരോഗമിക്കുകയാണെന്ന് സൈബരാബാദ് കമീഷണര്‍ വ്യക്തമാക്കി. നാല് എം.എല്‍.എമാരെയും മുഖ്യമന്ത്രിയുടെ ഔദ്യോഗിക വസതിയായ പ്രഗതിഭവനിലേക്ക് കൊണ്ടുപോയതായാണ് വിവരം.