അഫ്ഗാനിസ്താനില്‍ ശക്തമായ ഭൂചലനം; 320 പേര്‍ മരിച്ചതായി റിപ്പോര്‍ട്ട്; 12 ഗ്രാമങ്ങള്‍ പൂര്‍ണമായും തകര്‍ന്നു

കാബൂള്‍: പടിഞ്ഞാറന്‍ അഫ്ഗാനിസ്താനിലെ ഹെറാത്ത് പ്രവിശ്യയിലുണ്ടായ ഭൂചലനത്തില്‍ 320 പേര്‍ കൊല്ലപ്പെട്ടതായി റിപ്പോര്‍ട്ട്. നിരവധി പേര്‍ക്ക് പരുക്കേറ്റു. റിക്ടര്‍ സ്‌കെയിലില്‍ 6.3 തീവ്രത രേഖപ്പെടുത്തിയ ഭൂചലനവും തുടര്‍ചലനങ്ങളുമാണ് അഫ്ഗാനില്‍ വന്‍ നാശം വിതച്ചത്.

സിന്ദാ ജാന്‍, ഘോര്യന്‍ ജില്ലകളിലെ 12 ഗ്രാമങ്ങള്‍ പൂര്‍ണമായി തകര്‍ന്നതായി അധികൃതര്‍ അറിയിച്ചു. ഫറാ, ബാദ്ഗിസ് പ്രവിശ്യകളിലെയും ചില വീടുകള്‍ ഭാഗികമായി തകര്‍ന്നതായി മന്ത്രാലയ വക്താവ് വീഡിയോയില്‍ പറഞ്ഞു.

തകര്‍ന്ന കെട്ടിടങ്ങള്‍ക്കിടയില്‍ നിരവധി പേര്‍ കുടുങ്ങിക്കിടക്കുന്നുണ്ടെന്നാണ് വിവരം. മരണസംഖ്യ ഇനിയും ഉയര്‍ന്നേക്കാം.