സംസ്ഥാനത്തിന് അടിയന്തര കൊവിഡ് പ്രതിരോധ പാക്കേജ്
തിരുവനന്തപുരം: അടിയന്തര കൊവിഡ് പ്രതിരോധ പാക്കേജിനു (ഇ.സി.പി.ആര്‍) കീഴില്‍ കേരളത്തിലെ എല്ലാ ജില്ലകള്‍ക്കും ഒരു കോടി രൂപ വീതം അനുവദിക്കുമെന്ന് കേന്ദ്ര ആരോഗ്യമന്ത്രി മന്‍സൂഖ് മാണ്ഡവ്യ മുഖ്യമന്ത്രി പിണറായി വിജയനുമായും ആരോഗ്യമന്ത്രി വീണാ ജോര്‍ജുമായും നടത്തിയ കൂടിക്കാഴ്ചയില്‍ അറിയിച്ചു.
രണ്ടാം കൊവിഡ് പ്രതിരോധ പാക്കേജിന്റെ ഭാഗമായി 267.35 കോടി രൂപ നേരത്തെ അനുവദിച്ചതിനു പുറമെയാണിത്.
ഓരോ ജില്ലകള്‍ക്കും അവരുടെ മെഡിക്കല്‍ പൂള്‍ സൃഷ്ടിക്കുന്നതിനാണ് ഒരു കോടി രൂപ വീതം അനുവദിക്കുന്നത്.

കേരളത്തിലെ എല്ലാ ജില്ലകളിലും ടെലിമെഡിസിന്റെ മികവിന്റെ കേന്ദ്രങ്ങള്‍ സൃഷ്ടിക്കും. ജില്ലാ ആശുപത്രികളില്‍ 10 കിലോലിറ്റര്‍ ദ്രവീകൃത ഓക്‌സിജന്‍ സംഭരണ ടാങ്ക് സൗകര്യത്തോടെ പീഡിയാട്രിക് ഐ.സി.യു സ്ഥാപിക്കും.

കൊവിഡ് പടരുന്ന സാഹചര്യത്തില്‍ ഓണാഘോഷം കരുതലോടെ വേണമെന്നും കേന്ദ്രമന്ത്രി നിര്‍ദേശിച്ചു.കൊവിഡ് വ്യാപനം കുറയാതെ തുടരുന്ന സാഹചര്യത്തില്‍ സ്ഥിതിഗതികള്‍ നേരിട്ടു വിലയിരുത്താനാണ് കേന്ദ്രമന്ത്രി കേരളത്തിലെത്തിയത്. ആരോഗ്യമന്ത്രിക്കൊപ്പം കേന്ദ്ര ആരോഗ്യമന്ത്രാലയത്തില്‍നിന്നുള്ള പ്രത്യേകസംഘവും ഉണ്ടായിരുന്നു. തിരുവനന്തപുരം മെഡിക്കല്‍ കോളജിലും എച്ച്.എല്‍.എല്ലിലും ആരോഗ്യമന്ത്രിയും സംഘവും സന്ദര്‍ശനം നടത്തി.