ന്യൂഡല്‍ഹി: താലിബാനുമായി ആശയവിനിമയത്തിനുള്ള വഴിതേടി കേന്ദ്ര സര്‍ക്കാര്‍. താലിബാന്‍ നേതൃത്വത്തിലുള്ള സര്‍ക്കാറിനെ അംഗീകരിച്ചാലും ഇല്ലെങ്കിലും അഫ്ഗാനിസ്ഥാനിലെ ഭരണാധികാരികളെന്ന നിലയില്‍ ഇരു സര്‍ക്കാറുകളും തമ്മില്‍ ആശയവിനിമയം അനിവാര്യമാണ്.

അഫ്ഗാനിസ്ഥാനിലെ ഇന്ത്യന്‍ ജനതയുടെ സുരക്ഷ, ഇന്ത്യന്‍ എംബസിയുടെ സുരക്ഷ, ഇരുരാജ്യങ്ങള്‍ക്കുമിടയിലുള്ള വിമാനസര്‍വിസുകള്‍, അഫ്ഗാന്‍ വ്യോമപാത ഉപയോഗിക്കല്‍, അടിയന്തര സാഹചര്യത്തിലെ സഹായം തുടങ്ങിയ കാര്യങ്ങള്‍ ഇതുമായി ബന്ധപ്പെട്ടു കിടക്കുന്നു.

ദോഹയിലെ താലിബാന്‍ പ്രതിനിധികള്‍ മുഖേന വിദേശകാര്യമന്ത്രാലയം ഇക്കാര്യങ്ങളില്‍ വ്യക്തത വരുത്താന്‍ ശ്രമിച്ചിരുന്നു. 1999ലെ എയര്‍ ഇന്ത്യ വിമാനം റാഞ്ചി കാണ്ഡഹാറില്‍ ഇറക്കിയപ്പോള്‍ താലിബാന്‍ സര്‍ക്കാറുമായി ആശയവിനിമയം നടത്താന്‍ ഇന്ത്യക്ക് തുടക്കത്തില്‍ മാര്‍ഗങ്ങളൊന്നുമുണ്ടായിരുന്നില്ല.
ഈ സാഹചര്യം ആവര്‍ത്തിക്കാതിരിക്കാനാണ് ശ്രമം. താലിബാന് പാകിസ്താനോടുള്ള താല്‍പര്യം ഇന്ത്യയുമായുള്ള ബന്ധത്തെ എങ്ങനെ ബാധിക്കുമെന്നതാണ് പ്രധാനമായും ഉറ്റുനോക്കുന്നത്.