താമസ, ജോലി, അതിർത്തി ലംഘനം: സഊദിയിൽ ഒരാഴ്ചക്കിടെ പിടിയിലായത് 15,201 പേർ

റിയാദ്: സഊദി അറേബ്യയിൽ താമസ, ജോലി, അതിർത്തി സുരക്ഷാ ചട്ടങ്ങൾ ലംഘിച്ച 15,201 പേരെ പിടികൂടി. സെപ്തംബർ 28 മുതൽ ഒക്ടോബർ 4 വരെയുള്ള ഒരാഴ്ചയ്ക്കുള്ളിലാണ് ഇത്രയും പേരെ അറസ്റ്റ് ചെയ്തതെന്ന് സഊദി ആഭ്യന്തര മന്ത്രാലയം അറിയിച്ചു.

പിടികൂടിയ മൊത്തം നിയമ ലംഘകരിൽ 9,233 പേർ റെസിഡൻസി സമ്പ്രദായം ലംഘിച്ചതിനും 4,271 പേർ അതിർത്തി സുരക്ഷാ സംവിധാനം ലംഘിച്ചതിനും 1,697 പേർ തൊഴിൽ നിയമ ലംഘനങ്ങൾക്കും ആണെന്ന് മന്ത്രാലയം വിശദമാക്കി. അനധികൃതമായി രാജ്യത്തേക്ക് കടക്കാൻ ശ്രമിച്ച 527 പേർ പിടിയിലായി. ഇവരിൽ 55 ശതമാനം യെമൻ പൗരന്മാരും 43 ശതമാനം എത്യോപ്യക്കാരും രണ്ട് ശതമാനം മറ്റ് രാജ്യക്കാരുമാണ്. കൂടാതെ, ക്രമരഹിതമായി രാജ്യം വിടാൻ ശ്രമിച്ചതിന് 66 വ്യക്തികളെ അറസ്റ്റ് ചെയ്തു.

ഗതാഗതം, പാർപ്പിടം, ജോലി എന്നിവയിലെ നിയമലംഘനത്തിന് 14 വ്യക്തികളെ പിടികൂടി. നിലവിൽ 36,713 പുരുഷന്മാരും 7,749 സ്ത്രീകളും ഉൾപ്പെടെ 44,462 തടവുകാരാണ് ചട്ടങ്ങൾ ലംഘിച്ചതിന് നടപടിക്രമങ്ങൾ നേരിടുന്നത്.

39,218 നിയമലംഘകരെ യാത്രാ രേഖകൾ ലഭിക്കുന്നതിനായി അവരുടെ നയതന്ത്ര ഓഫീസുകളിലേക്ക് റഫർ ചെയ്തതായും 1,748 പേരുടെ യാത്രാ റിസർവേഷൻ പൂർത്തിയാക്കുന്ന പ്രക്രിയയിലാണെന്നും 8,058 പേരെ നാടുകടത്തിയതായും മന്ത്രാലയം റിപ്പോർട്ട് ചെയ്തു.

അതേസമയം, നിയമം ലംഘിച്ച് രാജ്യത്തേക്ക് കടക്കുന്നവരെയും രാജ്യം വിടുന്നവരെയും സഹായിക്കുന്നത് ഗുരുതരമായ കുറ്റമാണെന്ന് മന്ത്രാലയം അറിയിച്ചു. നിയമലംഘകരെ സഹായിക്കുന്നവർക്ക് 15 വർഷം വരെ തടവും ഒരു ദശലക്ഷം റിയാൽ വരെ പിഴയും ഉപയോഗിച്ച വാഹനങ്ങളും ഭവനങ്ങളും കണ്ടുകെട്ടുകയും ചെയ്യും.