ഇസ്‌റാഈലിലേക്കുള്ള കൂടുതല്‍ വിമാനങ്ങള്‍ റദ്ദാക്കി എയര്‍ ഇന്ത്യ; ഈ മാസം 14 വരെ സര്‍വീസില്ല

ഡല്‍ഹി: ഇസ്‌റാഈല്‍-ഹമാസ് സംഘര്‍ഷത്തിന്റെ പശ്ചാത്തലത്തില്‍ ടെല്‍ അവീവലേക്കും തിരിച്ചുമുള്ള സര്‍വീസുകള്‍ റദ്ദാക്കി എയര്‍ഇന്ത്യ. ഒക്ടോബര്‍ 14 വരെയുള്ള സര്‍വീസുകളാണ് റദ്ദാക്കിയത്. യാത്രക്കാരുടേയും വിമാന ജീവനക്കാരുടേയും സുരക്ഷ പരിഗണിച്ചാണ് തീരുമാനമെന്ന് എയര്‍ ഇന്ത്യ വ്യക്തമാക്കി.

എയര്‍ ഇന്ത്യ ടെല്‍ അവീവിലേക്ക് ആഴ്ചയില്‍ അഞ്ച് വിമാനങ്ങള്‍ സര്‍വീസ് നടത്തുന്നുണ്ട്. തിങ്കള്‍, ചൊവ്വ, വ്യാഴം, ശനി, ഞായര്‍ ദിവസങ്ങളില്‍ ഓരോന്നിനും അങ്ങോട്ടും ഇങ്ങോട്ടും ഓരോ വിമാനവും ഇതില്‍ ഉള്‍പ്പെടുന്നു.

ഇന്നലെ ടെല്‍ അവീവിലേക്കുള്ള എല്ലാ സര്‍വീസുകളും കമ്പനി റദ്ദാക്കിയിരുന്നു. ഇതിന് പിന്നാലെയാണ് ഒക്ടോബര്‍ 14 വരെയുള്ള സര്‍വീസുകള്‍ റദ്ദാക്കിയതായി അറിയിപ്പ് വന്നത്.