ഔറംഗാബാദ്: ബിഹാറിലെ ഔറംഗാബാദില്‍ ഛാത്ത് പൂജക്കിടെ ഗ്യാസ് സിലിണ്ടര്‍ പൊട്ടിത്തെറിച്ച് 30ലേറെ പേര്‍ക്ക് പരുക്കേറ്റു. പലരുടെയും പരുക്ക് ഗുരുതരമാണ്. തീ നിയന്ത്രണ വിധേയമാക്കാന്‍ ശ്രമിക്കുന്നതിനിടെ നിരവധി പൊലിസുകാര്‍ക്കും പൊള്ളലേറ്റു.

വൈദ്യുതി ഷോര്‍ട്ട് സര്‍ക്യൂട്ടിനെ തുടര്‍ന്ന് തീ പടര്‍ന്നുപിടിക്കുകയും ഗ്യാസ് സിലിണ്ടര്‍ ലീക്കായി വന്‍ ശബ്ദത്തോടെ പൊട്ടിത്തെറിക്കുകയുമായിരുന്നു. നാട്ടുകാരും ഫയര്‍ഫോഴ്‌സും പൊലിസും ചേര്‍ന്നാണ് രക്ഷാപ്രവര്‍ത്തനം നടത്തിയത്.

പത്തോളം പേരുടെ പരുക്ക് ഗുരുതരമാണ്. ഏഴ് പോലിസുകാര്‍ക്കും പൊള്ളലേറ്റു. സാരമായി പരുക്കേറ്റവരെ ഔറംഗാബാദ് സദര്‍ ആശുപത്രിയില്‍ പ്രവേശിപ്പിച്ചു. മറ്റുള്ളവര്‍ പ്രദേശത്തെ സ്വകാര്യ നഴ്‌സിങ് ഹോമില്‍ ചികില്‍സ തേടി.

ശനിയാഴ്ച പുലര്‍ച്ചെ 2.30ഓടെയാണ് അപകടം. വീട്ടില്‍ വച്ച് ഒരു കുടുംബം പ്രസാദം പാചകംചെയ്യുന്നതിനിടെ തീപ്പിടിത്തമുണ്ടാവുകയായിരുന്നുവെന്ന് വീട്ടുടമ അനില്‍ ഗോസ്വാമി പറഞ്ഞു. പൊലിസ് അന്വേഷണം ആരംഭിച്ചു.