മലപ്പള്ളി (പത്തനംതിട്ട): ഓട്ടോറിക്ഷയില്‍ കടത്താന്‍ ശ്രമിച്ച ഒന്നര ലക്ഷത്തോളം രൂപ വിലമതിക്കുന്ന 25 കിലോ ചന്ദനം പൊലിസ് പിടികൂടി. എസ്.പി.യുടെ നേതൃത്വത്തിലുള്ള ഷാഡോ പൊലിസിന് ലഭിച്ച രഹസ്യ വിവരത്തെ തുടര്‍ന്ന് മല്ലപ്പള്ളി സര്‍ക്കിള്‍ ഇന്‍സ്‌പെക്ടര്‍ കെ. സലീമിന്റെ നേതൃത്വത്തിലുള്ള പട്രോളിങ് സംഘമാണ് പ്രതികളെ പിടികൂടിയത്.
ചിറ്റാര്‍ പുതുവേലില്‍ വീട്ടില്‍ പ്രസന്നന്‍ (51), മാന്നാര്‍ കുരട്ടികാട് പുതുപ്ലേത്ത് പ്രശോഭ് (34), മാന്നാര്‍ തട്ടയക്കാട്ട് കിഴക്കേതില്‍ ഷെരീഫ് എന്നിവരാണ് അറസ്റ്റിലായത്.
കഴിഞ്ഞ വ്യാഴാഴ്ച രാത്രി എട്ടിന് കീഴ്‌വായ്പൂര് പടുതോട് പാലത്തിന് സമീപത്തുവച്ച് പൊലിസ് നടത്തിയ വാഹന പരിശോധനയ്ക്കിടയിലാണ് ഓട്ടോറിക്ഷയുടെ പിന്‍ഭാഗത്ത് ഒളിപ്പിച്ചനിലയില്‍ ചന്ദനമുട്ടികള്‍ കണ്ടത്.
കോന്നി വനമേഖലയില്‍ നിന്നുമാണ് ചന്ദനം കടത്തിയതെന്ന് കരുതുന്നു. 25 കിലോ തൂക്കം വരുന്ന 14 കഷ്ണം ചന്ദനമുട്ടികളാണ് പിടികൂടിയത്. അറസ്റ്റിലായ പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.