ഹൈഡ്രജൻ ട്രെയിൻ പരീക്ഷണ ഓട്ടം തുടങ്ങാനൊരുങ്ങി സഊദി അറേബ്യ

റിയാദ്: ഹൈഡ്രജൻ ട്രെയിൻ പരീക്ഷണ ഓട്ടങ്ങൾക്ക് തുടക്കമിട്ട് സഊദി അറേബ്യ. രാജ്യം കൂടുതൽ സുസ്ഥിരമായ ഗതാഗത സംവിധാനങ്ങൾ നടപ്പിലാക്കുന്നതിന്റെ ഭാഗമായാണ് ഫ്രഞ്ച് ട്രെയിൻ കമ്പനിയായ അൽസ്റ്റോമുമായി കരാർ ഒപ്പിട്ടത്. സഊദി അറേബ്യ റെയിൽവേ (എസ്എആർ) ആണ് ഇക്കാര്യം അറിയിച്ചത്.

ഭാവിയിൽ രാജ്യത്തിന്റെ പരിസ്ഥിതിക്ക് അനുയോജ്യമായ രീതിയിൽ ഇത്തരത്തിലുള്ള ട്രെയിനുകൾ തയ്യാറാക്കുന്നതിന് ആവശ്യമായ പ്രവർത്തന പരിശോധനകളും പഠനങ്ങളും സഊദി അറേബ്യ റെയിൽവേ നടത്തും.

"ഏറ്റവും പുതിയ സ്മാർട്ട് സാങ്കേതികവിദ്യകൾ സ്വീകരിക്കുന്ന കൂടുതൽ സുസ്ഥിരമായ ഗതാഗത സംവിധാനത്തിലേക്ക് നീങ്ങാനുള്ള പദ്ധതിയുടെ ഭാഗമാണ് ഈ നടപടി," ഗതാഗത, ലോജിസ്റ്റിക്സ് മന്ത്രിയും എസ്എആർ ഡയറക്ടർ ബോർഡ് ചെയർമാനുമായ എഞ്ചി. സലേഹ് അൽ ജാസർ പറഞ്ഞു.

സഊദിയുടെ വിഷൻ 2030 പദ്ധതിയുടെ ഭാഗമായാണ് ഹൈഡ്രജൻ ട്രെയിനുകൾക്ക് സഊദി അറേബ്യ പച്ചക്കൊടി വീശിയത്.

പുനരുപയോഗ ഊർജം, പ്രകൃതി വാതകം എന്നിവയിൽ നിന്ന് ഉത്പാദിപ്പിക്കാൻ കഴിയുന്ന ഹൈഡ്രജൻ, ലോകം കുറഞ്ഞ കാർബൺ ലോകത്തേക്ക് മാറുന്നതിനാൽ ഭാവി വർഷങ്ങളിൽ ഒരു നിർണായക ഇന്ധനമായി മാറുമെന്ന് പരക്കെ സൂചനയുണ്ട്.