തൃശൂര്‍: തൃശൂര്‍ മഹാരാജാസ് ടെക്‌നിക്കല്‍ ഇന്‍സ്റ്റിറ്റ്യൂട്ട് കോളേജ് പ്രിന്‍സിപ്പലിന് എസ്എഫ്‌ഐ ഭീഷണി. കഴിഞ്ഞ ചൊവ്വാഴ്ചയാണ് സംഭവം ഉണ്ടായത്. മഹാരാജാസ് ടെക്‌നിക്കല്‍ ഇന്‍സ്റ്റിറ്റ്യൂട്ട് പ്രിന്‍സിപ്പല്‍ ഇന്‍ ചാര്‍ജ് ഡോ. ദിലീപിന് നേരെയാണ് എസ്എഫ്‌ഐ ജില്ലാ സെക്രട്ടറി ഹസന്‍ മുബാരക് ഭീഷണി മുഴക്കിയത്. പൊലീസ് സാന്നിധ്യത്തിലായിരുന്നു എസ്എഫ്‌ഐ നേതാവിന്റെ ആക്രോശം.

'അധ്യാപകരോട് ഞങ്ങള്‍ക്ക് ബഹുമാനമാണ്. പക്ഷേ തെമ്മാടിത്തരം കാണിച്ചാല്‍ കാല് തല്ലിയൊടിക്കും. ഞങ്ങള്‍ കുറേ പേരെ കണ്ടിട്ടുണ്ട്. സിന്‍ഡിക്കേറ്റിലും സെനറ്റിലും ഒക്കെ ഞങ്ങള്‍ അംഗങ്ങളാണ്. ഞങ്ങളുടെ കുട്ടികളെ തൊട്ടാലുണ്ടല്ലോ, മര്യാദയ്ക്ക് മാപ്പെഴുതി കൊടുത്തോ. ഇല്ലെങ്കിലുണ്ടല്ലോ, കാല് തല്ലിയൊടിക്കും, പുറത്തിറങ്ങ്. എസ്എഫ്‌ഐ ജില്ലാ സെക്രട്ടറിയാണ് പറയുന്നത്'. ഇതായിരുന്നു ഭീഷണി.

സംഭവ സമയം പൊലീസും സഹ അധ്യാപകരും ഓഫീസിലുണ്ടായിരുന്നു. സംഭവത്തിന്റെ സിസിടിവി ദൃശ്യങ്ങള്‍ പുറത്തുവന്നു. ഒരു വിദ്യാര്‍ത്ഥിയെ പ്രിന്‍സിപ്പല്‍ മര്‍ദ്ദിച്ചു എന്നാരോപിച്ച് എംടിഐയില്‍ കുറച്ച് ദിവസങ്ങളായി എസ്.എഫ്.ഐ സമരം നടക്കുന്നുണ്ടായിരുന്നു.

അതേസമയം, സംഭവത്തില്‍ എസ്.എഫ്.ഐ ജില്ലാ സെക്രട്ടറിക്കെതിരെ പൊലിസ് കേസെടുത്തു. തൃശൂര്‍ ഈസ്റ്റ് പൊലിസാണ് കേസെടുത്തത്. ജില്ലാ സെക്രട്ടറി ഉള്‍പ്പെടെ ആറ് പേര്‍ക്കെതിരെയാണ കേസ്. പ്രിന്‍സിപ്പല്‍ ഇന്‍ ചാര്‍ജ് ഡോക്ട!ര്‍ ദിലീപിന്റെ പരാതിയിലാണ് കേസെടുത്തത്. ജാമ്യം കിട്ടാവുന്ന വകുപ്പുകളാണ് ചുമത്തിയിട്ടുള്ളത്. അന്യായമായി സംഘം ചേരല്‍, അതിക്രമിച്ച് കടക്കല്‍, കൃത്യനിര്‍വഹണം തടസ്സപ്പെടുത്തി തുടങ്ങിയ വകുപ്പുകളാണ് ചുമത്തിയിട്ടുള്ളത്.