ഇന്ത്യക്കെതിരെ അഫ്ഗാനിസ്താന് ടോസ്; അശ്വിന് പകരം ഷാര്‍ദ്ദൂല്‍ താക്കൂര്‍

ന്യൂഡല്‍ഹി: ഏകദിന ക്രിക്കറ്റ് ലോകകപ്പില്‍ രണ്ടാം മത്സരത്തിലും ഇന്ത്യക്ക് ടോസ് നഷ്ടം. ഗ്രൂപ്പ് സ്‌റ്റേജിലെ രണ്ടാം മത്സരത്തില്‍ ന്യൂഡല്‍ഹി അരുണ്‍ ജയ്റ്റ്‌ലി സ്‌റ്റേഡിയത്തില്‍ ഇന്ന് ഇന്ത്യക്കെതിരേ ടോസ് നേടിയ അഫ്ഗാനിസ്താന്‍ നായകന്‍ ഹഷ്മത്തുള്ള ഷാഹിദി ബാറ്റിങ് തെരഞ്ഞെടുത്തു. തുടര്‍ച്ചയായ രണ്ടാം വിജയം ലക്ഷ്യമിട്ടാണ് ഇന്ത്യ ഇന്ന് ഇറങ്ങുന്നത്

ഓസ്‌ട്രേലിയക്കെതിരെ ചെന്നൈയില്‍ ആദ്യ മത്സരം കളിച്ച ടീമില്‍ ഒരു മാറ്റവുമായാണ് ഇന്ത്യ ഇന്നിറങ്ങുന്നത്. സ്പിന്നര്‍ ആര്‍ അശ്വിന് പകരം പേസര്‍ ഷാര്‍ദ്ദുല്‍ താക്കൂര്‍ ഇന്ത്യയുടെ അന്തിമ ഇലവനിലെത്തി. മുഹമ്മദ് ഷമിക്ക് ഇന്നും പ്ലേയിംഗ് ഇലവനില്‍ ഇടമില്ല.

ആദ്യ മത്സരത്തില്‍ ബംഗ്ലാദേശിനോടേറ്റ തോല്‍വിയില്‍ നിന്ന് കരകയറാനായിരിക്കും അഫ്ഗാന്‍ പട ഇന്ത്യക്കെതിരെ ഇറങ്ങിയത്.

സ്ഥിരം ഓപ്പണര്‍ ശുഭ്മാന്‍ ഗില്‍ ഇല്ലാതെയാണ് ഇന്ത്യ അഫ്ഗാനെ നേരിടാനിറങ്ങുന്നത്. ഡെങ്കിപ്പനി ബാധിച്ച് ഓസീസിനെതിരായ ആദ്യ മത്സരം നഷ്ടമായ ഗില്‍ അഫ്ഗാനെതിരെയും കളിക്കാനിറങ്ങില്ല. താരത്തിന് പാകിസ്താനെതിരെ നടക്കുന്ന മൂന്നാം മത്സരവും നഷ്ടമാകുമെന്നാണ് ഒടുവിലെത്തുന്ന റിപ്പോര്‍ട്ടുകള്‍. ഗില്ലിന് പകരം ഇഷാന്‍ കിഷന്‍ തന്നെയായിരിക്കും രോഹിത്തിനൊപ്പം ഓപ്പണിങ്ങിനിറങ്ങുക.