കൊല്ലം: നഗരത്തിനുസമീപമുള്ള വീടില്‍ നിന്നും 750 കിലോയില്‍ അധികം വരുന്ന നിരോധിത പാന്‍മസാല ശേഖരം പിടികൂടി. സംഭവത്തില്‍ രണ്ടു പേര്‍ അറസ്റ്റിലായി. ബംഗാള്‍ സ്വദേശിയായ മുഹമ്മദ് ഇസ്തഹര്‍(19), ബീഹാര്‍ സ്വദേശിയായ കമല്‍(20) എന്നിവര്‍ അറസ്റ്റിലായത്. എന്നാല്‍ മുഖ്യപ്രതി രക്ഷപെട്ടു. 70 ലക്ഷം രൂപയുടെ ഉല്‍പനങ്ങളാണ് പിടിച്ചെടുത്തതെന്ന് എക്‌സൈസ് അറിയിച്ചു.
 മൂന്നാം കുറ്റിയില്‍ അറുന്നൂറ്റിമംഗലം ചേരിയില്‍ അക്രമുദീന്റെ വീട്ടിലെ കിടപ്പുമുറിയില്‍ ടൈല്‍സ് ഇളക്കി അടിയില്‍ വലിയ അറകളുണ്ടാക്കിയാണ് ലക്ഷക്കണക്കിന് രൂപയുടെ പുകയില ഉല്‍പന്നങ്ങള്‍ സൂക്ഷിച്ചിരുന്നത്. കുട്ടികളെ ആകര്‍ഷിക്കുന്ന മധുരം കൂട്ടിയ വീര്യമാര്‍ന്ന ലഹരിയും പിടികൂടിയിട്ടുണ്ട്. അക്രമുദീനാണ് സംഘത്തിലെ തലവനെന്ന് എക്‌സൈസ് അറിയിച്ചു.
പ്രത്യേക ഏജന്റുമാരെ നിയോഗിച്ച് ദിവസവും 5000 ല്‍ അധികം പാക്കറ്റ് പാന്‍മസാല ഉല്‍പന്നങ്ങള്‍ ജില്ലയുടെ വിവിധ ഭാഗങ്ങളിലേക്ക് ഈ വീട്ടില്‍നിന്നാണ് എത്തിക്കുന്നത്. ഉടമ അക്രമുദ്ദീന്‍ എന്നയാളിനെപ്പറ്റി അന്വേഷണം ആരംഭിച്ചു.