ബാസിത് ഹസന്‍

തൊടുപുഴ: സംസ്ഥാന വൈദ്യുതി ബോര്‍ഡിന് ഓണക്കൊയ്ത്ത്. പവര്‍ എക്‌സ്‌ചേഞ്ച് വഴി കഴിഞ്ഞ 10 ദിവസം വൈദ്യുതി വിറ്റ വകയില്‍ കെ.എസ്.ഇ.ബിക്ക് ലഭിച്ചത് 38.62 കോടി രൂപ. ഇന്നലെയായിരുന്നു റെക്കോഡ് വില്‍പനയും വിലയും. ഇന്നലെ രാവിലെ ഏഴിനവസാനിച്ച 24 മണിക്കൂറില്‍ 7.28 കോടി രൂപയുടെ വൈദ്യുതി വിറ്റു. 10.8325 ദശലക്ഷം യൂനിറ്റ് വൈദ്യുതി യൂനിറ്റിന് 6.73 രൂപ നിരക്കിലാണ് വിറ്റത്.
അതേസമയം പ്രതിദിന ആഭ്യന്തരോത്പാദനം കുറയ്ക്കുകയാണ്. കഴിഞ്ഞയാഴ്ചകളില്‍ 40 ദശലക്ഷം യൂനിറ്റിനു മുകളിലായിരുന്ന ആഭ്യന്തരോത്പാദനം 33 ദശലക്ഷത്തിലേക്ക് താഴ്ത്തി. ഇതോടൊപ്പം പുറം വൈദ്യുതിയുടെ അളവ് ഉയര്‍ത്തിയിട്ടുണ്ട്. ഇന്നലെ 37.5526 ദശലക്ഷം യൂനിറ്റ് വൈദ്യുതി പുറത്തുനിന്നെത്തിച്ചു. കഴിഞ്ഞയാഴ്ചകളില്‍ 25 ദശലക്ഷം യൂനിറ്റില്‍ താഴെയായിരുന്നു പുറം വൈദ്യുതി. 70.6756 ദശലക്ഷം യൂനിറ്റായിരുന്നു ഇന്നലെ സംസ്ഥാനത്തെ ഉപഭോഗം. പ്രളയഭീതിയില്‍ ജലനിരപ്പ് കുറച്ചുനിര്‍ത്താനായിരുന്നു ആഭ്യന്തരോത്പാദനം ഉയര്‍ത്തിയത്. എന്നാല്‍ പ്രതീക്ഷിച്ച മഴ പോലും കിട്ടാത്ത സാഹചര്യത്തില്‍ കഴിഞ്ഞദിവസം നടന്ന വൈദ്യുതി ബോര്‍ഡ് പവര്‍ പൊസിഷന്‍ അനാലിസിന്റെ അടിസ്ഥാനത്തിലാണ് ഉത്പാദനം കുറച്ചത്.
ഓഗസ്റ്റ് ഒന്നുമുതല്‍ ഇന്നലെ വരെ 1030.645 ദശലക്ഷം യൂനിറ്റ് വൈദ്യുതിക്കുള്ള വെള്ളമാണ് കെ.എസ്.ഇ.ബി ലോഡ് ഡെസ്പാച്ച് സെന്റര്‍ പ്രതീക്ഷിച്ചിരുന്നത്. എന്നാല്‍ മഴക്കുറവ് മൂലം 714.298 ദശലക്ഷം യൂനിറ്റിനുള്ളതു മാത്രമാണ് അണക്കെട്ടുകളില്‍ ഒഴുകിയെത്തിയത്.
സംഭരണശേഷിയുടെ 68 ശതമാനം വെള്ളമാണ് എല്ലാ അണക്കെട്ടുകളിലുമായി നിലവിലുള്ളത്. സംസ്ഥാനത്തിന്റെ മൊത്തം സംഭരണശേഷിയുടെ പകുതിയിലധികം ഉള്‍ക്കൊള്ളുന്ന ഇടുക്കി അണക്കെട്ടില്‍ 66 ശതമാനം വെള്ളമുണ്ട്.