മൊഗാദിശു: സൊമാലിയന്‍ തലസ്ഥാനത്ത് ബീച്ച് റെസ്റ്റോറന്റിനു നേരേയുണ്ടായ ചാവേര്‍ ആക്രമണത്തില്‍ പത്തു പേര്‍ കൊല്ലപ്പെട്ടു. അല്‍ശബാബാണ് ആക്രമണത്തിനു പിന്നിലെന്ന് പൊലിസ് പറഞ്ഞു.
കാര്‍ബോംബ് സ്‌ഫോടനമാണ് നടന്നത്. സ്‌ഫോടനത്തിനു മുന്‍പ് ചാവേറുകള്‍ സുരക്ഷാ ഉദ്യോഗസ്ഥരുമായി വെടിവയ്പു നടത്തി.
ലിദോ ബീച്ചിലെ ബനാദിര്‍ ബീച്ച് റെസ്റ്റോറന്റിനു നേരെയാണ് ആക്രമണമുണ്ടായത്. കൂടുതല്‍ വിവരങ്ങള്‍ ലഭിച്ചിട്ടില്ലെന്ന് പൊലിസ് ഓഫിസര്‍ മേജര്‍ അഹ്മദ് ഇബ്‌റാഹീം പറഞ്ഞു. അല്‍ഖാഇദയും ആക്രമണത്തിന്റെ ഉത്തരവാദിത്വം ഏറ്റെടുത്തിട്ടുണ്ട്.
അല്‍ഖാഇദയുടെ സൈനിക ഓപ്പറേഷന്‍ വക്താവാണ് ആക്രമണത്തിന്റെ ഉത്തരവാദിത്വം ഏറ്റെടുത്ത് പ്രസ്താവന നടത്തിയത്.
പുതിയ തുര്‍ക്കി എംബസിയുടെ സമീപത്തു നിര്‍ത്തിയിട്ട കാര്‍ ബോംബാണ് പൊട്ടിത്തെറിച്ചത്. കഴിഞ്ഞ ജനുവരിയില്‍ ലിദോ ബീച്ചില്‍ അല്‍ശബാബ് നടത്തിയ ആക്രമണത്തില്‍ 17 പേര്‍ കൊല്ലപ്പെട്ടിരുന്നു.