ഓസ്‌ട്രേലിയ തരിപ്പണം, ദക്ഷിണാഫ്രിക്കക്ക് വമ്പന്‍ ജയം

ലഖ്‌നൗ: ഓസ്‌ട്രേലിയക്കെതിരെ ദക്ഷിണാഫ്രിക്കക്ക് വമ്പന്‍ ജയം. 134 റണ്‍സിനാണ് മുന്‍ ചാമ്പ്യന്മാരായ ആസ്‌ട്രേലിയയെ പ്രോട്ടീസ് തരിപ്പണമാക്കിയത്. സ്‌കോര്‍: ദക്ഷിണാഫ്രിക്ക 50 ഓവറില്‍ ഏഴു വിക്കറ്റിന് 311. ആസ്‌ട്രേലിയ 40.5 ഓവറില്‍ 177 റണ്‍സിന് ഔള്‍ ഔട്ടായി. ഓസീസിന്റെ തുടര്‍ച്ചയായ രണ്ടാം തോല്‍വിയാണിത്. ആദ്യ മത്സരം ഇന്ത്യയോടാണ് പരാജയപ്പെട്ടത്. ദക്ഷിണാഫ്രിക്കക്ക് രണ്ടാം ജയവും. മാര്‍നസ് ലബുഷെയ്‌നാണ് ഓസീസ് നിരയിലെ ടോപ് സ്‌കോറര്‍. 74 പന്തില്‍ 46 റണ്‍സെടുത്താണ് താരം പുറത്തായത്. മറ്റു ബാറ്റര്‍മാര്‍ക്കൊന്നും ദക്ഷിണാഫ്രിക്കയുടെ ബൗളിങ്ങിനു മുന്നില്‍ പിടിച്ചുനില്‍ക്കാനായില്ല.

മിച്ചല്‍ മാര്‍ഷ് (15 പന്തില്‍ ഏഴ്), ഡേവിഡ് വാര്‍ണര്‍ (27 പന്തില്‍ 13), സ്റ്റീവ് സ്മിത്ത് (16 പന്തില്‍ 19), ജോഷ് ഇംഗ്ലിസ് (നാലു പന്തില്‍ അഞ്ച്), ഗ്ലെന്‍ മാക്‌സ് വെല്‍ (17 പന്തില്‍ മൂന്ന്), മാര്‍കസ് സ്റ്റോയിനിസ് (നാലു പന്തില്‍ അഞ്ച്), മിച്ചല്‍ സ്റ്റാര്‍ക് (51 പന്തില്‍ 27), പാറ്റ് കമ്മിന്‍സ് (21 പന്തില്‍ 22), ജോഷ് ഹേസല്‍വുഡ് (രണ്ടു പന്തില്‍ രണ്ട്) എന്നിവരാണ് പുറത്തായ മറ്റു താരങ്ങള്‍. 11 റണ്‍സുമായി ആദം സാംപ പുറത്താകാതെ നിന്നു.

ദക്ഷിണാഫ്രിക്കക്കായി കഗിസോ റബാദ മൂന്നു വിക്കറ്റ് വീഴ്ത്തി. മാര്‍കോ ജാന്‍സെന്‍, കേശവ് മഹാരാജ്, തബ്രായിസ് ഷംസി എന്നിവര്‍ രണ്ടു വിക്കറ്റ് വീതവും ലുങ്കി എന്‍ഗിഡി ഒരു വിക്കറ്റും നേടി. നേരത്തെ ടോസ് നഷ്ടപ്പെട്ട് ബാറ്റിങ്ങിനറങ്ങിയ ദക്ഷിണാഫ്രിക്ക ക്വിന്റന്‍ ഡി കോക്കിന്റെ സെഞ്ച്വറി കരുത്തിലാണ് 311 റണ്‍സെടുത്തത്. ഈ ലോകകപ്പിലെ ഡീ കോക്കിന്റെ തുടര്‍ച്ചയായ രണ്ടാം സെഞ്ച്വറിയാണ്. 106 പന്തില്‍ അഞ്ചു സിക്‌സും എട്ടു ഫോറുമടക്കം 109 റണ്‍സെടുത്താണ് താരം പുറത്തായത്.ശ്രീലങ്കക്കെതിരായ ആദ്യ മത്സരത്തിലും താരം സെഞ്ച്വറി നേടിയിരുന്നു.