തിരുവനന്തപുരം:  സംസ്ഥാനത്തെ വിവിധ സര്‍വകലാശാല വിസിമാര്‍ക്ക് ചാന്‍സലറായ ഗവര്‍ണര്‍ നല്‍കിയ കാരണം കാണിക്കല്‍ നോട്ടിസിന്റെ കാലാവധി ഇന്ന് അവസാനിക്കും. മുന്‍ കേരള സര്‍വകലാശാല വൈസ് ചാന്‍സലര്‍ വി പി മഹാദേവന്‍ പിള്ള ഒഴികെയുള്ളവര്‍ വിശദീകരണം നല്‍കിയിട്ടില്ല. വിസിയാകാന്‍ വേണ്ട യോഗ്യതകള്‍ ഉണ്ടെന്നാണ് മുന്‍ കേരള വിസിയുടെ മറുപടി. നോട്ടിസിനെതിരെ ഹൈക്കോടതിയെ സമീപിച്ചതിനാല്‍ മറ്റ് വിസിമാര്‍ വിശദീകരണം നല്‍കാനിടയില്ല.

എന്തുകൊണ്ടാണ് നിശ്ചയിച്ചു നല്‍കിയ സമയത്തിനകം രാജിവെക്കാതിരുന്നത് എന്ന കാരണം അറിയിക്കാനാണ് ഗവര്‍ണര്‍ വൈസ് ചാന്‍സലര്‍മാര്‍ക്ക് നോട്ടീസ് നല്‍കിയത്. മറുപടി നല്‍കാനുള്ള സമയപരിധി ഇന്ന് അവസാനിക്കുമെങ്കിലും നേരിട്ട് വിശദീകരണം നല്‍കാന്‍ നവംബര്‍ ഏഴ് വരെ സമയം അനുവദിച്ചിട്ടുണ്ട്.

കൂടിയാലോചനയ്ക്കും നിയമോപദേശത്തിനും ശേഷം മറുപടി നല്‍കാനായിരുന്നു വിസിമാര്‍ ആദ്യം തീരുമാനിച്ചത്. എന്നാല്‍ ഇന്നലെ ഹൈക്കോടതിയെ സമീപിച്ചതിനാല്‍ വിധി വന്നശേഷം മറുപടി നല്‍കുന്നതില്‍ തീരുമാനമെടുക്കാമെന്നാണ് ബാക്കി വിസിമാരുടെ നിലപാട്.