'ഇന്ത്യയിലെ 100 സമ്പന്നമാർ'; പട്ടികയിൽ ഇടം പിടിച്ച് ആറ് യുഎഇ ഇന്ത്യക്കാർ, ഒന്നാമത് യൂസഫലി

ദുബൈ: ഫോർബ്‌സിന്റെ 'ഇന്ത്യയിലെ 100 സമ്പന്നരുടെ പട്ടിക'യിൽ യുഎഇ ആസ്ഥാനമായുള്ള ആറ് ഇന്ത്യൻ സംരംഭകർ ഇടംപിടിച്ചു. ഇതിൽ അഞ്ച് പേർ കേരളത്തിൽ നിന്നുള്ളവരാണ്. ലുലു ഗ്രൂപ്പ് ഇന്റർനാഷണലിന്റെ ചെയർമാനും മാനേജിംഗ് ഡയറക്ടറുമായ എം.എ യൂസഫലി, ലാൻഡ്മാർക്ക് ഗ്രൂപ്പ് ചെയർവുമൺ രേണുക ജഗ്തിയാനി, ജോയ് ആലുക്കാസ് ഗ്രൂപ്പ് ചെയർമാൻ ഡോ. ജോയ് ആലുക്കാസ്, ബുർജീൽ ഹോൾഡിംഗ്‌സിന്റെ സ്ഥാപകനും ചെയർമാനുമായ ഡോ. ഷംസീർ വയലിൽ, ആർ.പി. ഗ്രൂപ്പ് ചെയർമാനും മാനേജിങ് ഡയറക്ടറുമായ രവി പിള്ള, ജെംസ് എഡ്യുക്കേഷൻ ഗ്രൂപ്പിന്റെ സ്ഥാപകൻ സണ്ണി വർക്കി എന്നിവരാണ് യുഎഇ ആസ്ഥാനമായുള്ള ആറ് ഇന്ത്യൻ സംരംഭകർ.

92 ബില്യൺ ഡോളർ ആസ്തിയുമായി റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനിയാണ് ഇന്ത്യയിലെ 100 സമ്പന്നരുടെ പട്ടികയിൽ ഒന്നാം സ്ഥാനത്ത്. 68 ബില്യൺ ഡോളർ ആസ്തിയുള്ള അദാനി ഗ്രൂപ്പ് ചെയർമാൻ ഗൗതം അദാനിയാണ് രണ്ടാം സ്ഥാനത്ത്.

ലോകത്തിലെ ഏറ്റവും വേഗത്തിൽ വളരുന്ന ഹൈപ്പർമാർക്കറ്റ്-സൂപ്പർമാർക്കറ്റ് നെറ്റ്‌വർക്കുകളിൽ ഒന്നായ ലുലു ഗ്രൂപ്പിന്റെ ചെയർമാൻ എം.എ യൂസഫലി യുഎഇ ആസ്ഥാനമായുള്ള ഇന്ത്യൻ വ്യവസായികളുടെ പട്ടികയിൽ ഒന്നാമതെത്തി. 7.1 ബില്യൺ ഡോളറിന്റെ ആസ്തിയാണ് യൂസഫലിക്ക് ഉള്ളത്. പട്ടികയിൽ 27-ാം സ്ഥാനത്താണ് അദ്ദേഹം. കഴിഞ്ഞ വർഷം 5.4 ബില്യൺ ഡോളർ ആസ്തിയുമായി 35-ാം സ്ഥാനത്തായിരുന്നു.

രേണുക ജഗ്തിയാനിയാണ് യുഎഇ ആസ്ഥാനമായുള്ള രണ്ടാമത്തെ ഇന്ത്യൻ സമ്പന്ന. ഈ വർഷം മെയ് മാസത്തിൽ അവരുടെ ഭർത്താവ് മിക്കി ജഗ്തിയാനി അന്തരിച്ചതിന് പിന്നാലെയാണ് അവർ ലാൻഡ്‌മാർക്ക് ഗ്രൂപ്പിന്റെ തലപ്പത്ത് എത്തിയത്. 4.8 ബില്യൺ ഡോളർ ആസ്തിയുമായി 44-ാം സ്ഥാനത്താണ് രേണുക ജഗ്തിയാനി ഇടം പിടിച്ചത്. 2022ൽ അവരുടെ സമ്പത്ത് 2.9 ബില്യൺ ഡോളറായിരുന്നു.

മിഡിൽ ഈസ്റ്റിലെ ഏറ്റവും വലിയ ജ്വല്ലറി നെറ്റ്‌വർക്കുകളുടെ ഉടമയായ ജോയ് ആലുക്കാസ് 4.4 ബില്യൺ ഡോളർ ആസ്തിയുമായി 50-ാം സ്ഥാനത്താണ്. കഴിഞ്ഞ വർഷത്തെ 69-ാം സ്ഥാനത്ത് നിന്നും അദ്ദേഹം തന്റെ സ്ഥാനം ഇത്തവണ മെച്ചപ്പെടുത്തി. 2022-ൽ, ഫോർബ്സ് കണക്കുപ്രകാരം അദ്ദേഹത്തിന്റെ ആസ്തി 3.1 ബില്യൺ ഡോളറായിരുന്നു.

പട്ടികയിൽ ഇടംപിടിച്ച ഏറ്റവും പ്രായം കുറഞ്ഞ ഇന്ത്യൻ വ്യവസായി ഡോ. ഷംസീർ വയലിലിന്റെ ആസ്തി 3.7 ബില്യൺ ഡോളറാണ്. പട്ടികയിൽ ഇടംപിടിച്ച ഏറ്റവും ധനികനായ ഇന്ത്യൻ ഡോക്ടർ കൂടിയാണ് അദ്ദേഹം.

ആർപി ഗ്രൂപ്പിന്റെ രവി പിള്ള 69-ാം സ്ഥാനത്താണ്. അദ്ദേഹത്തിന്റെ ആസ്തി 3.2 ബില്യൺ ഡോളറാണ്. മിഡിൽ ഈസ്റ്റിലെ ഇന്ത്യക്കാരുടെ ഏറ്റവും വലിയ തൊഴിൽദാതാക്കളിൽ ഒന്നാണ് ആർപി ഗ്രൂപ്പ്.

ജെംസ് ഗ്രൂപ്പിന്റെ സണ്ണി വർക്കിയുടെ ആസ്തി 2.93 ബില്യൺ ഡോളറാണ്. പട്ടികയിൽ 78-ാം സ്ഥാനത്താണ് സണ്ണി വർക്കി. ലോകത്തിലെ ഏറ്റവും വലിയ സ്വകാര്യ കിന്റർഗാർട്ടൻ-ടു-ഗ്രേഡ്-12 സ്‌കൂളുകളുടെ ഏറ്റവും വലിയ ഓപ്പറേറ്ററായ ജെംസ് എഡ്യൂക്കേഷൻ അദ്ദേഹത്തിന്റെ ഉടമസ്ഥതയിലാണ് പ്രവർത്തിക്കുന്നത്.

ഫോബ്‌സ് 'ഇന്ത്യയിലെ 100 സമ്പന്നരുടെ പട്ടിക'യിൽ യുഎഇ ആസ്ഥാനമായുള്ള ആറ് ഇന്ത്യൻ സംരംഭകരിൽ യൂസഫലി, ജോയ് ആലുക്കാസ്, ഡോ ഷംഷീർ, രവി പിള്ള, സണ്ണി വർക്കി എന്നിവർ കേരളത്തിൽ നിന്നുള്ളവരാണ്.