കാബൂള്‍: കാബൂള്‍ അന്താരാഷ്ട്ര വിമാനത്താവളത്തിലുണ്ടായ വെടിവയ്പില്‍ അഫ്ഗാന്‍ സുരക്ഷാ സൈനികന്‍ കൊല്ലപ്പെട്ടതായി ജര്‍മന്‍ സേന അറിയിച്ചു. മൂന്നുപേര്‍ക്കു പരുക്കേറ്റു. 

സായുധരായ തോക്കുധാരികളും സുരക്ഷാ സൈനികരും തമ്മിലുണ്ടായ ഏറ്റുമുട്ടലിലാണ് മരണം. യു.എസ്, ജര്‍മന്‍ സൈനികരും അക്രമികള്‍ക്കു നേരെ വെടിയുതിര്‍ത്തു. ഇതാദ്യമായാണ് വിമാനത്താവള സംഘര്‍ഷത്തില്‍ പടിഞ്ഞാറന്‍ സേന പങ്കെടുക്കുന്നത്.  

വിമാനത്താവളത്തിനു പുറത്തുനിന്ന് അക്രമി വെടിവച്ചതോടെയാണ് സംഘര്‍ഷത്തിനു തുടക്കമെന്ന് സി.എന്‍.എന്‍ റിപ്പോര്‍ട്ട് ചെയ്തു. യു.എസ് സൈനികരെ സഹായിക്കാനായി കാവല്‍ നില്‍ക്കുന്ന അഫ്ഗാന്‍ സേനയിലെ സൈനികര്‍ക്കു നേരെയാണ് വടക്കു ഭാഗത്തുനിന്ന് വെടിവയ്പുണ്ടായത്. എന്നാല്‍ വെടിവയ്പിനു ശേഷം വിമാനത്താവളത്തിലെ ക്രമസമാധാനം നിയന്ത്രണവിധേയമായെന്ന് നാറ്റോ സൈനികര്‍ അറിയിച്ചു. നിലവില്‍ 600ഓളം അഫ്ഗാന്‍ സൈനികരാണ് ഇവിടെ വിദേശ സൈനികരുടെ കൂടെ കാവല്‍ നില്‍ക്കുന്നത്. 

വിമാനത്താവളത്തിനു പുറത്ത് താലിബാന്‍ സേനയുമുണ്ട്. അവരാണോ വെടിവച്ചതെന്നു വ്യക്തമല്ല. വിമാനത്താവളത്തിലേക്കു കടക്കാന്‍ ആളുകള്‍ തിക്കിത്തിരക്കുന്നത് തടയാന്‍ ഇടയ്ക്കിടെ വെടിവയ്പു നടക്കുന്നതായി റിപ്പോര്‍ട്ടുണ്ട്. വെടിവയ്പിലും തിക്കിലും തിരക്കിലും പെട്ട് ഒരാഴ്ചയ്ക്കിടെ 20ലേറെ പേരാണ് കൊല്ലപ്പെട്ടത്.

ഈമാസം 15ന് താലിബാന്‍ സേന കാബൂള്‍ പിടിച്ചടക്കിയതോടെ ആയിരക്കണക്കിന് അഫ്ഗാനികളും വിദേശികളും രാജ്യംവിടാന്‍ തിരക്കുകൂട്ടുകയാണ്. യു.എസ്, ബ്രിട്ടന്‍ തുടങ്ങിയ രാജ്യങ്ങളുടെ വ്യോമസേനാ-ചരക്കു വിമാനങ്ങളില്‍ ആളുകളെ ഒഴിപ്പിക്കുന്നത് ഇന്നലെയും തുടര്‍ന്നു.