ഗുവാഹത്തി: തുടർച്ചയായ മൂന്നുപരാജയങ്ങൾക്ക് ശേഷം വിജയവഴിയിൽ തിരിച്ചെത്തി കേരളാ ബ്ലാസ്റ്റേഴ്‌സ്. പോയിന്റ് പട്ടികയിൽ ഏറ്റവും പിന്നിലുള്ള നോർത്ത് ഈസ്റ്റ് യുനൈറ്റഡിനെ അവരുടെ തട്ടകത്തിൽ ഏകപക്ഷീയമായ മൂന്നുഗോളുകൾക്കാണ് ബ്ലാസ്‌റ്റേഴ്‌സ് പരാജയപ്പെടുത്തിയത്. ഗോൾരഹിത ആദ്യപകുതിക്ക് ശേഷമായിരുന്നു മൂന്നുഗോളുകളും. പകരക്കാരനായി ഇറങ്ങിയ മലയാളി താരം സഹൽ അബ്ദുൽ സമദ് രണ്ടുഗോളുകൾ നേടി. ഗ്രീക്ക് താരം ദിമിത്രിയോസ് ഡയമന്റക്കോസിന്റെ വകയായിരുന്നു മൂന്നാംഗോൾ.

56ാം മിനിറ്റിലായിരുന്നു ദിമിത്രിയോസ് ഡയമന്റക്കോസിന്റെ ഗോൾ. 86, രണ്ടാംപകുതിയുടെ ഇഞ്ച്വുറി ടൈമിലുമായിരുന്നു സഹലിന്റെ ഗോൾ. രണ്ടാംഗോൾ ശരിക്കുമൊരു മലയാളി ടച്ചുള്ള ഗോളാവുകയുംചെയ്തു. മലയാളി താരം കെ.പി രാഹുലിൽ നിന്ന് പാസ് സ്വീകരിച്ച സഹൽ പന്ത് അതുപോലെ പോസ്റ്റിലേക്ക് അടിച്ചുകയറ്റുകയായിരുന്നു. ഈ സീസണിലെ സഹലിന്റെ ആദ്യ ഗോളാണിത്. കളി അവസാനിക്കാൻ സെക്കന്റുകൾ മാത്രമുള്ളപ്പോഴായിരുന്നു സഹലിന്റെ രണ്ടാം ഗോൾ. അഞ്ചുകളിയിൽ നിന്ന് രണ്ടുവിജയത്തോടെ ബ്ലാസ്‌റ്റേഴ്‌സിന് ആറുപോയിന്റായി.

നേരത്ത വെലിയ മാറ്റങ്ങളോടെയാണ് ബ്ലാസ്‌റ്റേഴ്‌സ് ഇറങ്ങിയത്. പ്രതിരോധ താരങ്ങളായ സന്ദീപ് സിങ്ങും നിഷു കുമാറും ആദ്യ ഇലവനിൽ ഇടംനേടിയപ്പോൾ ഹർമൻ ജോത് ഖബ്ര, നായകൻ ജെസ്സൽ കർണെയ്‌റോ എന്നിവർ പുറത്തായി. പ്രതിരോധത്തിലെ പിഴവുകളായിരുന്നു കഴിഞ്ഞ മത്സരങ്ങളിൽ ബ്ലാസ്റ്റേഴ്‌സിന്റെ തോൽവിക്ക് കാരണം. പതിവായി ആദ്യ ഇലവനിൽ സ്ഥാനം പിടിക്കാറുള്ള സഹൽ അബ്ദുസമ്മദും ഇക്കുറി ആദ്യം ഇറങ്ങിയില്ല. എന്നാൽ മറ്റൊരു മലയാളി താരം കെ.പി. രാഹുൽ ആദ്യ 11ൽ ഇടംപിടിച്ചു.

Sahal Abdul Samad Double Sinks NorthEast