കൊച്ചി: 2019ലെ കേരള മദ്‌റസാധ്യാപക ക്ഷേമനിധി ഫണ്ട് നിയമം റദ്ദാക്കണമെന്നാവശ്യപ്പെട്ട് സമര്‍പ്പിച്ച ഹരജികളില്‍ ഒരാഴ്ചയ്ക്കകം വിശദീകരണം നല്‍കണമെന്ന് ഹൈക്കോടതി. 

പെന്‍ഷന്‍ ഉള്‍പ്പെടെയുള്ള സാമ്പത്തിക സഹായങ്ങള്‍ നല്‍കുന്നതിനുള്ള നിയമം റദ്ദാക്കണമെന്നാവശ്യപ്പെട്ട് സിറ്റിസന്‍സ് ഓര്‍ഗനൈസേഷന്‍ ഫോര്‍ ഡെമോക്രസി, ഇക്വാലിറ്റി ആന്‍ഡ് സെക്യുലറിസം എന്ന സംഘടനക്കു വേണ്ടി ആലുവ സ്വദേശി മനോജും കൊച്ചിയിലെ ക്രിസ്ത്യന്‍ അസോസിയേഷന്‍ ഓഫ് സോഷ്യല്‍ ആക്ഷന്‍ (കാസ) എന്ന സംഘടനയും നല്‍കിയ ഹരജികളിലാണ് ചീഫ് ജസ്റ്റിസ് അടങ്ങുന്ന ഡിവിഷന്‍ ബെഞ്ചിന്റെ ഉത്തരവ്. 

നേരത്തെ ഹരജി പരിഗണിക്കവേ വിശദീകരണത്തിന് സര്‍ക്കാരിന് നിര്‍ദേശം നല്‍കിയെങ്കിലും നടപ്പാക്കാത്ത സാഹചര്യത്തിലാണ് വീണ്ടും ഉത്തരവിട്ടത്. 2018 ഓഗസ്റ്റ് 31ന് സംസ്ഥാന സര്‍ക്കാര്‍ പാസാക്കിയ ഓര്‍ഡിനന്‍സ് നിയമസഭയില്‍ വയ്ക്കാത്ത സാഹചര്യത്തില്‍ ഓര്‍ഡിനന്‍സ് കാലഹരണപ്പെട്ടതായും മദ്‌റസകളില്‍ ഇസ്‌ലാമുമായി ബന്ധപ്പെട്ട പുസ്തകങ്ങള്‍ മാത്രമാണ് പഠിപ്പിക്കുന്നതെന്നതിനാല്‍ സര്‍ക്കാര്‍ ഫണ്ട് ഉപയോഗിക്കുന്നത് ഭരണഘടന വിരുദ്ധമാണെന്നുമാണ് ഹരജിയിലെ വാദം. വിശദമായ വാദം കേള്‍ക്കുന്ന ബഞ്ചിന്റെ പരിഗണനയ്ക്കു വിടാന്‍ ചീഫ് ജസ്റ്റിസിന്റെ ബെഞ്ച് രജിസ്ട്രാര്‍ക്ക് നിര്‍ദേശം നല്‍കി.