ന്യൂഡൽഹി: ചീഫ് ജസ്റ്റിസ് യു.യു ലളിതും ജസ്റ്റിസ് രവീന്ദ്രഭട്ടും ആണ് മുന്നോക്ക സംവരണ കേസ് പരിഗണിച്ച ബെഞ്ചിൽ നരേന്ദ്രമോദി സർക്കാർ കൊണ്ടുവന്ന ഭരണഘടനാ ഭേദഗതിയെ എതിർത്തത്. എന്നാൽ, മുന്നോക്ക സംവരണം ഭരണഘടനാപരമാണെന്ന് ജസ്റ്റിസ് ദിനേഷ് മഹേശ്വരി, ജസ്റ്റിസ് ബേല എം. ത്രിവേദി, ജസ്റ്റിസ് ജെ.ബി പർദ്ദിവാലാ എന്നിവർ വിധിച്ചു.

സാമ്പത്തികമായി പിന്നാക്കം നിൽക്കുന്ന മുന്നാക്ക വിഭാഗങ്ങൾക്കുള്ള 10 ശതമാനം സംവരണം ഏർപ്പെടുത്തിയുള്ള 103 ാം ഭേദഗതി ഭരണഘടനയുടെ അന്തസത്തയ്ക്ക് ചേർന്നതല്ലെന്നായിരുന്നു ചീഫ്ജസ്റ്റിസിന്റെയും രവീന്ദ്രഭട്ടിന്റെയും നിലപാട്. സംവരണത്തിന്റെ ക്രൈറ്റീയ ലംഘിക്കാൻ പാടില്ല. മൊത്തം സംവരണത്തിന് ഭരണഘടന പരിധി നിശ്ചയിച്ചിട്ടുണ്ട്. അത് ലംഘിക്കുന്നത് ഭരണഘടനാവിരുദ്ധമാണ്- ഭട്ട് വ്യക്തമാക്കി.

കേസിനാസ്പദമായ ഭേദഗതി
2019 ജനുവരിയിലാണ് 103-ാമത് ഭരണഘടനാ ഭേദഗതി മോദി സർക്കാർ പാർലമെന്റിൽ അവതരിപ്പിച്ചത്. ലോക്‌സഭയിൽ അതിനെ മുസ്ലിം ലീഗിന്റെ രണ്ടും മജ്‌ലിസിന്റെ അസദുദ്ദീൻ ഉവൈസിയും മാത്രമായിരുന്നു എതിർത്തത്. വൻഭൂരിപക്ഷത്തിൽ ബില്ല് പാസ്സായി.
ഭരണഘടനയുടെ 15, 16 അനുച്ഛേദങ്ങളിൽ ഭേദഗതി ചെയതാണ് സർക്കാർ ജോലികളിലും വിദ്യാഭ്യാസ സ്ഥാപനങ്ങളിലെ പ്രവേശനത്തിനും മുന്നാക്ക വിഭാഗത്തിലെ സാമ്പത്തികമായി പിന്നാക്കം നിൽക്കുന്നവർക്ക് 10 ശതമാനം സംവരണം ഏർപ്പെടുത്തുന്നതായിരുന്നു നിയമം. ഇതോടെ സർക്കാർ, സ്വകാര്യ, എയ്ഡഡ് വിദ്യാഭ്യാസ സ്ഥാപനങ്ങളിൽ സംസ്ഥാന സർക്കാരിന് സംവരണം ഏർപ്പെടുത്താൻ സാധിക്കും. ഈ ഭേദഗതിയാണിപ്പോൾ സുപ്രീം കോടതി ശരിവെച്ചത്.
ഇതിനെതിരെ 39 ഹർജികളാണ് കോടതി പരിഗണിച്ചത്. എസ്.എൻ.ഡി.പി, ഡി.എം.കെ, വിവിധ പിന്നോക്ക സംഘടനകൾ തുടങ്ങിയവയടക്കം കോടതിയെ സമീപിച്ചിരുന്നു. കേരളത്തിൽ നിന്ന് മുന്നോക്ക സമുദായ മുന്നണി ഉൾപ്പെടെ സംഘടനകളും കേസിൽ കക്ഷി ചേർന്നിരുന്നു.

10 pc Quota For Poor Cleared By Supreme Court