കൊച്ചി: പ്രതിപക്ഷ നേതാവ് വി.ഡി. സതീശനെതിരേ  എറണാകുളം ഡി.സി.സി ഓഫിസിന് മുന്നിലെ മതിലില്‍ പോസ്റ്റര്‍. മുതിര്‍ന്ന നേതാക്കളെ അവഗണിക്കുന്ന സതീശന്റെ പൊയ്മുഖം തിരിച്ചറിയണമെന്നും ഗ്രൂപ്പില്ലെന്ന് പറഞ്ഞ് സതീശന്‍ പുതിയ ഗ്രൂപ്പ് ഉണ്ടാക്കുകയാണെന്നുമാണ് പോസ്റ്ററിലെ ആരോപണങ്ങള്‍. 'കോണ്‍ഗ്രസ് പാര്‍ട്ടിക്കായി ജീവിതം ഹോമിച്ച ഉമ്മന്‍ചാണ്ടി, രമേശ് ചെന്നിത്തല, വി.എം. സുധീരന്‍ എന്നീ മുതിര്‍ന്ന നേതാക്കളെ അവഗണിക്കുന്ന വി.ഡി.സതീശന്റെ പൊയ്മുഖം തിരിച്ചറിയുക, ജില്ലയില്‍ കോണ്‍ഗ്രസിന് സീറ്റുകള്‍ നഷ്ടപ്പെട്ടാലും വേണ്ടില്ല തന്റെ ഗ്രൂപ്പുകാരന്‍ തന്നെ ജില്ലാ കോണ്‍ഗ്രസ് പ്രസിഡന്റ് ആകണമെന്നുള്ള വി.ഡി.സതീശന്റെ പിടിവാശിയും മര്‍ക്കടമുഷ്ടിയും അവസാനിപ്പിക്കുക, സ്വന്തം ഗ്രൂപ്പുകാരനെ ഡി.സി.സി പ്രസിഡന്റാക്കാന്‍ കിണഞ്ഞുശ്രമിക്കുന്ന വി.ഡി.സതീശന്റെ ഗ്രൂപ്പ് കളി അവസാനിപ്പിക്കുക, രക്ഷകന്റെ മുഖംമൂടി അണിഞ്ഞ് തന്ത്രപരമായി പുത്തന്‍ ഗ്രൂപ്പുണ്ടാക്കി കോണ്‍ഗ്രസ് പ്രസ്ഥാനത്തെ നശിപ്പിക്കുന്ന അഭിനവ തുഗ്ലക്ക് വി.ഡി.സതീശനെ തിരിച്ചറിയുക' എന്നിങ്ങനെയാണ് പോസ്റ്ററുകളിലെ വാചകങ്ങള്‍. യഥാര്‍ഥ കോണ്‍ഗ്രസ് പ്രവര്‍ത്തകന്‍ എന്ന പേരില്‍ ഇന്നലെ രാവിലെയാണ് പോസ്റ്ററുകള്‍ പ്രത്യക്ഷപ്പെട്ടത്.  പോസ്റ്ററുകള്‍ പിന്നീട്  നീക്കംചെയ്തു. ജില്ലാ കോണ്‍ഗ്രസ് അധ്യക്ഷനെ നിശ്ചയിക്കുന്നതിനുള്ള  ചര്‍ച്ചകള്‍ ഡല്‍ഹിയില്‍ പുരോഗമിക്കവേയാണ് പ്രതിപക്ഷ നേതാവിനെതിരേ അദ്ദേഹത്തിന്റെ ജില്ലയില്‍ത്തന്നെ പോസ്റ്ററുകള്‍ പ്രത്യക്ഷപ്പെട്ടത്.