രണ്ടര വയസ്സുകാരിയെ തട്ടിക്കൊണ്ടുപോകാന്‍ ശ്രമം; ഒഡീഷ സ്വദേശിയെ നാട്ടുകാര്‍ ഓടിച്ചിട്ട് പിടികൂടി

പെരുമ്പാവൂര്‍: മൊബൈല്‍ മോഷണ ശ്രമത്തിനിടെ രണ്ടര വയസ്സുകാരിയെ തട്ടിക്കൊണ്ടുപോകാന്‍ ശ്രമിച്ച ഒഡീഷ സ്വദേശിയെ നാട്ടുകാര്‍ ഓടിച്ചിട്ട് പിടികൂടി. വെങ്ങോല പഞ്ചായത്തിലെ പൂണൂരില്‍നിന്ന് അന്തര്‍ സംസ്ഥാന തൊഴിലാളികളുടെ മകളെയാണ് തട്ടിക്കൊണ്ടുപോകാന്‍ ശ്രമിച്ചത്. സംഭവത്തില്‍ ഒഡീഷ ഫുല്‍വാനി സ്വദേശി സിമാചല്‍ ബിഷോയിയെ നാട്ടുകാര്‍ പിടികൂടി പൊലീസില്‍ ഏല്‍പ്പിച്ചു.

തിങ്കളാഴ്ച ഉച്ചക്ക് 12 നാണ് സംഭവം. കുട്ടിയുടെ അച്ഛനും അമ്മയും മുത്തച്ഛനും മുത്തശ്ശിയും ജോലിക്ക് പോയതായിരുന്നു. സഹോദരങ്ങളായ മറ്റ് രണ്ട് കുട്ടികളോടൊപ്പം കളിച്ചുകൊണ്ടിരിക്കുകയായിരുന്നു പെണ്‍കുട്ടി. പ്രതി കുട്ടിയെ എടുക്കുന്നതിനിടെ മറ്റു കുട്ടികള്‍ ബഹളം വെച്ചു. ഇതോടെ കുട്ടിയുടെ കൈവശമുണ്ടായിരുന്ന മൊബൈല്‍ ഫോണ്‍ തട്ടിപ്പറിച്ച് ഇയാള്‍ ഓടുകയായിരുന്നുവെന്ന് പറയുന്നു.

ഓടിക്കൂടിയ പ്രദേശവാസികള്‍ പ്രതിയെ തടഞ്ഞുവച്ചു. പിന്നീട് പെരുമ്പാവൂര്‍ പൊലീസ് എത്തി കസ്റ്റഡിയിലെടുത്തു. മുത്തച്ഛന്റെ പരാതിയുടെ അടിസ്ഥാനത്തിലാണ് കേസെടുത്തത്.