ജിദ്ദ: സഊദിയിൽ നിന്നും രണ്ടു ഡോസ് വാക്‌സിൻ സ്വീകരിച്ചു നാട്ടിൽ അവധിക്ക് പോയ പ്രവാസികൾക്ക് മൂന്നാം രാജ്യത്തെ കോറന്റൈൻ ഇല്ലാതെ സഊദിയിലേക്ക് നേരിട്ട് മടങ്ങാമെന്ന സൗദി വിദേശകാര്യ മന്ത്രാലയത്തിന്റെ പുതിയ ഉത്തരവ് ഇന്ത്യൻ എംബസിയിൽ ലഭിച്ചു എന്ന വാർത്ത പ്രവാസികൾക്ക് വളരെ സന്തോഷമുണ്ടക്കുന്നതാണെന്നും എന്നാൽ റെഗുലർ വിമാന സർവീസ് അനുമതി ഇനിയും വൈകുമെന്നിരിക്കെ പ്രസ്തുത ഇളവ് പ്രയോജനപ്പെടുത്താൻ കേന്ദ്ര സർക്കാർ ഇന്ത്യ - സഊദി എയർ ബബ്ൾ കരാർ വഴി കൂടുതൽ വിമാന സർവീസുകൾ നടത്താൻ അടിയന്തിരമായി ഇടപെടണമെന്നു ജിദ്ദ കെഎംസിസി സെൻട്രൽ കമ്മിറ്റി കേന്ദ്ര സർക്കാരിനോട് ആവശ്യപ്പെട്ടു.

വർഷത്തിൽ ഒന്നും രണ്ടും മാസം മാത്രം അവധി ലഭിക്കുന്ന ലക്ഷകണക്കിന് പ്രവാസികൾ കഴിഞ്ഞ 2020- ൽ കൊറോണ ലോകത്തെ നിശ്ചലമാക്കിയത് മുതൽ യാത്ര നിയന്ത്രണങ്ങൾ കാരണം സമയത്തിന് തിരിച്ചു വരാനാവാതെ ജോലി നഷ്ടപ്പെടുമെന്ന ഭീതിയിൽ അവധിക്ക് പോവാതെ മാനസികമായും വിവിധ ശാരീരിക പ്രശ്നങ്ങൾ സഹിച്ചും സഊദിയിൽ പ്രയാസപ്പെടുകയാണെന്ന് കെഎംസിസി ഭാരവാഹികൾ ചൂണ്ടിക്കാട്ടി. സഊദി ഗവണ്മെന്റിന്റെ പുതിയ പ്രഖ്യാപനം പ്രയോജനപ്പെടുത്തുന്നതിന് ആവശ്യമായ കൂടുതൽ വിമാന സർവീസുകൾ തുടങ്ങുന്നതിന് കേന്ദ്ര സർക്കാർ നയതന്ത്ര കാര്യാലയങ്ങൾ വഴി സഊദി ഗവെർന്മെന്റുമായി റെഗുലർ വിമാന സർവീസ് എത്രയും വേഗം തുടങ്ങുന്നതിനുള്ള ചർച്ചകളും എയർ ബബ്ൾ വിമാന സർവീസുകൾ മുഖേന കൂടുതൽ വിമാന സർവീസുകൾ നടത്തുന്നതിനും വേണ്ട ശ്രമങ്ങൾ ഉടനെ ഉണ്ടാവണമെന്ന് സെൻട്രൽ കമ്മിറ്റി ആവശ്യപ്പെട്ടു.

സഊദിയിലേക്ക് നേരിട്ടുള്ള യാത്ര പ്രാവർത്തികമായാൽ സഊദിയിൽ നിന്ന് രണ്ടു വാക്‌സിനേഷൻ എടുത്തു ഇപ്പോൾ നാട്ടിൽ അവധിയിൽ കഴിയുന്ന പ്രവാസികൾക്ക് സമയത്തിന് തിരിച്ചു വരുന്നതിനും മൂന്നാം രാജ്യങ്ങൾ വഴി ചുറ്റി വലിയ സാമ്പത്തിക ബാധ്യതയും സമയവും ചെലവഴിച്ചു സഊദിയിലേക്ക് മടങ്ങുന്ന പ്രയാസങ്ങളും ചാർട്ടേർഡ് വിമാനങ്ങൾ വഴി വൻ തുക മുടക്കി യാത്ര ചെയ്യുന്ന ബുദ്ധിമുട്ടുകളും ലഘൂകരിക്കാനാവുമെന്നും സെൻട്രൽ കമ്മിറ്റി ചൂണ്ടിക്കാട്ടി. ആയതിനാൽ
ഇക്കാര്യത്തിൽ എത്രയും വേഗം നടപടികൾ ഉണ്ടാവുന്നതിന് സംസ്ഥാന സർക്കാർ കേന്ദ്ര സർക്കാരിൽ വേണ്ട സമ്മർദ്ദം ചെലുത്തണമെന്നും ജിദ്ദ കെഎംസിസി സെൻട്രൽ കമ്മിറ്റി പ്രസിഡണ്ട് അഹമ്മദ് പാളയാട്ട്, ജനറൽ സെക്രട്ടറി അബൂബക്കർ അരിമ്പ്ര, ട്രഷറർ അൻവർ ചേരങ്കൈ , ചെയർമാൻ നിസാം മമ്പാട്, മറ്റു ഭാരവാഹികളായ സി.കെ റസാഖ് മാസ്റ്റർ, ഇസ്മായിൽ മുണ്ടക്കുളം, ഇസ്ഹാഖ് പൂണ്ടോളി , നാസർ മച്ചിങ്ങൽ, ലത്തീഫ് മുസ്ലിയാരങ്ങാടി, പി.സി.എ. റഹ്‌മാൻ ഇണ്ണി, ശിഹാബ് താമരക്കുളം, എ.കെ ബാവ എന്നിവർ വാർത്ത കുറിപ്പിൽ ആവശ്യപ്പെട്ടു.