അഡ്‌ലെയ്ഡ്: ടി20 ലോകകപ്പ് ഫൈനല്‍ കാണാതെ ഇന്ത്യ പുറത്ത്. സെമി ഫൈനലില്‍ ഇംഗ്ലണ്ടിനെതിരെ പത്ത് വിക്കറ്റിന്റെ ദയനീയ തോല്‍വിയാണ് ഇന്ത്യ ഏറ്റുവാങ്ങിയത്. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ 20 ഓവറില്‍ ആറ് വിക്കറ്റ് നഷ്ടപ്പെട്ട് 168 റണ്‍സെടുത്തു. ഇന്ത്യ ഉയര്‍ത്തിയ വിജയലക്ഷ്യം ഒരു വിക്കറ്റ് പോലും നഷ്ടപ്പെടുത്താതെ 17 ഓവറില്‍ മറികടന്നു.

സ്‌കോര്‍: ഇന്ത്യ 20 ഓവറില്‍ 168(6), ഇംഗ്ലണ്ട് 170(0)

ഓപ്പണര്‍മാരായ ജോസ് ബട്‌ലറും(80) അലക്‌സ് ഹെയ്ല്‍സുമാണ് (86) ഇംഗ്ലണ്ടിന്റെ വിജയശില്‍പികള്‍.

ഓപ്പണര്‍ കെ.എല്‍ രാഹുലിനെ തുടക്കത്തില്‍ തന്നെ ഇന്ത്യക്ക് നഷ്ടമായി. ക്രിസ് വോക്‌സിന്റെ പന്തില്‍ രാഹുലിനെ ജോസ് ബട്‌ലര്‍ പിടിച്ചുപുറത്താക്കുകയായിരുന്നു. അഞ്ചുപന്തില്‍ നിന്ന് ഒരുബൗണ്ടറിസഹിതം അഞ്ചുറണ്‍സാണ് രാഹുലിന്റെ സമ്പാദ്യം.

അര്‍ധ സെഞ്ചുറി നേടിയ വിരാട് കോലി, ഹാര്‍ദിക് പാണ്ഡ്യ എന്നിവരുടെ ഇന്നിങ്‌സുകളാണ് ഇന്ത്യയ്ക്ക് തുണയായത്. 33 പന്തില്‍ അഞ്ച് സിക്‌സും നാല് ബൗണ്ടറിയുമടക്കം 63 റണ്‍സ് അടിച്ചെടുത്ത ഹര്‍ദിക് പാണ്ഡ്യയാണ് ഇന്ത്യയുടെ ടോപ് സകോറര്‍.

ഇംഗ്ലണ്ടിനായി ക്രിസ് ജോര്‍ദാന്‍ മൂന്ന് വിക്കറ്റുകള്‍ വീഴ്ത്തി. ക്രിസ് വോക്‌സ്, ആദില്‍ റാഷിദ് എന്നിവര്‍ ഓരോ വിക്കറ്റു വീതവും വീഴ്ത്തി.