റഫ അതിര്‍ത്തി വൈകാതെ തുറന്നേക്കും; അവശ്യവസ്തുക്കളുമായി 20 ട്രക്കുകള്‍ ഗസ്സയിലേക്ക്

ഗസ്സ: ഇസ്‌റാഈല്‍-ഹമാസ് സംഘര്‍ഷം തുടരുന്നതിനിടെ റഫ അതിര്‍ത്തി തുറക്കുമെന്ന് ഈജിപ്ത്. അവശ്യ വസ്തുക്കളുമായി എത്തുന്ന ട്രക്കുകള്‍ 20 എണ്ണം വീതം ദിവസവും ഗസ്സയിലേക്ക് പോകാന്‍ അനുവദിക്കും. യു.എസ് പ്രസിഡന്റ് ജോ ബൈഡനുമായി ചര്‍ച്ചചെയ്തതിന് പിന്നാലെ റഫാ അതിര്‍ത്തി തുറക്കാന്‍ ഈജിപ്ത് പ്രസിഡന്റ് അബ്ദേല്‍ ഫത്താഹ് അല്‍സിസി സമ്മതം അറിയിച്ചത്. എന്നാല്‍ അഭയാര്‍ഥികളെ റഫ അതിര്‍ത്തി വഴി ഈജിപ്തിലേക്ക് കടക്കാന്‍ അനുവദിക്കില്ലെന്നും അദ്ദേഹം വ്യക്തമാക്കിയിട്ടുണ്ട്.

റഫാ അതിര്‍ത്തയിലൂടെയുള്ള സഹായം തടയില്ലെന്ന് ഇസ്‌റാഈല്‍ അറിയിച്ചിട്ടുണ്ട്. ക്രോസിങിന് ചുറ്റുമുള്ള റോഡില്‍ അറ്റക്കുറ്റപ്പണികള്‍ നടക്കുന്നതിനാല്‍ ട്രക്കുകള്‍ വെള്ളിയാഴ്ച്ചയ്ക്ക് ശേഷം മാത്രമാണ് കടത്തിവിടുകയെന്ന് ബൈഡന്‍ അറിയിച്ചു. യു.എന്‍ സഹായം മറുവശത്ത് വിതരണം തുടരുമെന്നും അദ്ദേഹം പറഞ്ഞു. എന്നാല്‍ ഈ ട്രക്കുകള്‍ ഹമാസ് പിടിച്ചെടുത്താല്‍ സഹായം അതോടെ അവസാനിപ്പിക്കുമെന്നും ഈജിപ്ത് മുന്നറിയിപ്പ് നല്‍കിയിട്ടുണ്ട്.