ഇസ്‌റാഈലിന് പിന്തുണ; സംഘര്‍ഷം തുടരുന്നതിനിടെ ഇസ്‌റായേലിലെത്തി ബ്രിട്ടിഷ് പ്രധാനമന്ത്രി ഋഷി സുനക്

ലണ്ടന്‍: ഇസ്‌റാഈലിന് പിന്തുണയുമായി ബ്രിട്ടിഷ് പ്രധാനമന്ത്രി ഋഷി സുനക് ടെല്‍ അവീവിലെത്തി.'തീവ്രവാദമെന്ന തിന്‍മയ്‌ക്കെതിരേ ഇസ്രയേലിനൊപ്പം നില്‍ക്കും' വെള്ളിയാഴ്ച ടെല്‍ അവീവിലെത്തിയതിന് തൊട്ടുപിന്നാലെ ഋഷി സുനക് എക്‌സില്‍ കുറിച്ചു. യു.എസ് പ്രസിഡന്റ് ജോ ബൈഡന്‍ കഴിഞ്ഞ ദിവസം ഇസ്‌റാഈലിലെത്തിയതിന് പിന്നാലെയാണ് ബ്രിട്ടിഷ് പ്രധാനമന്ത്രിയുടെ സന്ദര്‍ശനം.

ഇസ്‌റാഈല്‍ പ്രസിഡന്റ് ഐസക് ഹെര്‍സോഗുമായി അദ്ദേഹം കൂടിക്കാഴ്ച്ച നടത്തി. ഇസ്‌റാഈലില്‍ കുടുങ്ങിയ ബ്രിട്ടിഷ് പൗരന്മാര്‍ക്ക് നല്‍കിയ സഹായങ്ങള്‍ക്ക് അദ്ദേഹം നന്ദി അറിയിച്ചു. ഗസ്സയിലേക്ക് കൂടുതല്‍ മാനുഷിക സഹായങ്ങള്‍ എത്തിക്കാന്‍ വഴി തുറക്കണമെന്നും സുനക് കൂടിക്കാഴ്ചയില്‍ ആവശ്യപ്പെടും.

പ്രശ്‌നപരിഹാരത്തിനുള്ള നയതന്ത്ര ശ്രമങ്ങളുടെ ഭാഗമായി ഇസ്‌റാഈലിന്റെ അയല്‍ രാജ്യങ്ങളും ഋഷി സുനക് സന്ദര്‍ശിക്കും.