പറവൂർ: പ്രതിപക്ഷ നേതാവ് വി.ഡി. സതീശനെതിരെ അതിനിശിത വിമർശനവുമായി എൻ.എസ്.എസ് ജനറൽ സെക്രട്ടറി ജി. സുകുമാരൻ നായർ. പറവൂരിൽ നവീകരിച്ച എൻ.എസ്.എസ് താലൂക്ക് യൂനിയൻ ആസ്ഥാനം സന്ദർശിച്ച ശേഷമാണ് സതീശനെതിരെ ആഞ്ഞടിച്ചത്.

അദ്ദേഹത്തിന്റെ വാക്കുകൾ ഇങ്ങനെ:
തിരഞ്ഞെടുപ്പിനുമുമ്പ് വി.ഡി. സതീശൻ ചങ്ങനാശ്ശേരിയിൽവന്ന് തന്റെയടുത്തിരുന്ന് ഒന്നരമണിക്കൂറോളം സംസാരിച്ചിരുന്നു. ജയിപ്പിക്കണമെന്നായിരുന്നു ആവശ്യം. അപ്പോൾതന്നെ താൻ പറവൂർ താലൂക്ക് യൂണിയൻ പ്രസിഡന്റിനെ ഫോണിൽ വിളിച്ച് എല്ലാ വീടുകളിലും പോയി പറയണമെന്ന് ആവശ്യപ്പെട്ടിരുന്നു. ഒരു നായരല്ലേ, ജയിച്ചോട്ടെയെന്നേ കരുതിയുള്ളൂ. എന്നാൽ, ജയിച്ചശേഷം ആദ്യം പറഞ്ഞത് ഒരു സാമുദായിക നേതാക്കളുടെയും തിണ്ണനിരങ്ങാറില്ലെന്നാണ്. അയാളുടെ ഭാവിക്കു വേണ്ടിയെങ്കിലും ഈ നിലപാട് ഇനി തിരുത്തണം. അല്ലെങ്കിൽ രക്ഷപ്പെടില്ല. ജനിച്ച സമുദായത്തെ സ്‌നേഹിക്കാത്തവർ ആരായാലും രക്ഷപ്പെടില്ല- സുകുമാരൻ നായർ പറഞ്ഞു.
ജനിച്ച സമുദായത്തെ തള്ളിപ്പറയുന്നവർ നമ്മുടെ കൂട്ടത്തിലുണ്ടെന്നും സതീശന്റെ ബന്ധുക്കളാരെങ്കിലും ഇവിടെയുണ്ടെങ്കിൽ ക്ഷമിക്കണമെന്നും പറഞ്ഞാണ് പ്രസംഗം അവസാനിപ്പിച്ചത്.

സതീശനെതിരെ മുൻപും സുകുമാരൻ നായർ രംഗത്തുവന്നിരുന്നു. നിയമസഭാ തെരഞ്ഞെടുപ്പിൽ പ്രതിപക്ഷ സ്ഥാനം ഉറപ്പായതിന് പിന്നാലെയായിരുന്നു സതീശനെതിരെയുള്ള പ്രസ്താവന. പ്രതിപക്ഷനേതാവ് സ്ഥാനം ഉറപ്പായപ്പോൾ മുതൽ മത സാമുദായിക സംഘടനകളെ സതീശൻ എതിർക്കുകയാണന്നായിരുന്നു അന്നത്തെ വിമർശനം.

nss general secretary g sukumarn nair aginst opposition leader vd satheesan