കോവളം: ഇന്നലെ രാത്രിയിലുണ്ടായ കാറ്റിലും മഴയിലും പെട്ട് മരം വീണ് വീടിന്റെ മേല്‍കൂര തകര്‍ന്നു.
കോവളം കുഴിവിളാകത്ത് ബിനുവിന്റെ വീടിനു മുകളില്‍ മഹാഗണിമരം മറിഞ്ഞ് വീണാണ് വീടിനു കേടുപാടുണ്ടായത്. ഇന്നലെ രാത്രി 11 മണിയോടെയായിരുന്നു അപകടം. അപകട സമയത്ത് ബിനുവിന്റെ ഭാര്യ സുജയും മക്കളായ ആറാംക്ലാസ് വിദ്യാര്‍ഥിനി അശ്വനിയും മൂന്നാംക്ലാസ് വിദ്യാര്‍ഥി അനൂജുമാണ് ഉണ്ടായിരുന്നത്. മരം കടപുഴകുന്നതിന്റെ ശബ്ദംകേട്ട് വീടിനുപുറത്തേക്ക് ഓടിയതിനാല്‍ രക്ഷപ്പെട്ടു.
അംഗവൈകല്യമുള്ള ഭര്‍ത്താവും മില്‍മയിലെ ദിവസവേതനക്കാരിയായ സുജയും 5 വര്‍ഷംമുമ്പ് ഭേലാക്ക് പഞ്ചായത്ത് സഹായത്തോടെ നിര്‍മിച്ച പണിപൂര്‍ത്തിയാകാത്ത വീടാണ് തകര്‍ന്നത്. വീട് ഭാഗികമായി തകര്‍ന്നതോടെ എന്തുചെയ്യണമെന്നറിയാത്ത അവസ്ഥയിലാണ് കുടുംബം.