തിരുവനന്തപുരം: സമ്പൂര്‍ണ ഒ.ഡി.എഫ് ജില്ലയായി തിരുവനന്തപുരത്തെ പ്രഖ്യാപിക്കുന്നതിനുളള നടപടികള്‍ക്ക് സഹകരണവും പങ്കാളിത്തവും ഉറപ്പുനല്‍കി വിവിധ സ്ഥാപനങ്ങള്‍.
സര്‍ക്കാര്‍ ധനസഹായം കൊണ്ടുമാത്രം ശൗചാലയ നിര്‍മാണം പൂര്‍ത്തീകരിക്കാന്‍ കഴിയാത്ത നിര്‍ധനരെ സഹായിക്കാനും നിര്‍മാണ പ്രവൃത്തി ബുദ്ധിമുട്ടേറിയ തീരദേശ-മലയോര മേഖലകളില്‍ കൂടുതല്‍ സഹായം നല്‍കാനും വ്യവസായ, വാണിജ്യ സ്ഥാപനങ്ങള്‍ ഫണ്ട് നല്‍കാമെന്ന് വിവിധ സ്ഥാപനങ്ങളുടെ പ്രതിനിധികള്‍ ജില്ലാകളക്ടര്‍ എസ്. വെങ്കിടേസപതിക്ക് വാഗ്ദാനം നല്‍കി. കളക്ടറേറ്റില്‍ വിളിച്ചുചേര്‍ത്ത യോഗത്തിലാണ് ഈ പ്രഖ്യാപനങ്ങളുണ്ടായത്. ശൗചാലയങ്ങള്‍ നിര്‍മിച്ച് ജില്ലയെ ഒക്‌ടോബര്‍ രണ്ടിനകം സമ്പൂര്‍ണ ഒ.ഡി.എഫ് ജില്ലയായി പ്രഖ്യാപിക്കുന്നതിനുളള പ്രവര്‍ത്തനങ്ങള്‍ സമയബന്ധിതമായി നടന്നുവരുകയാണെന്ന് കലക്ടര്‍ പറഞ്ഞു. പദ്ധതിയുടെ സമ്പൂര്‍ണ വിജയത്തിന് വിവിധ സന്നദ്ധ സംഘടനകളുടെയും സ്ഥാപനങ്ങളുടെയും വ്യക്തികളുടെയും കൂടുതല്‍ സഹായം ഉറപ്പാക്കേണ്ടതുണ്ട്. ഇതിനായി ഏവരുടെയും സഹകരണമുണ്ടാകണമെന്ന് ജില്ലാ കലക്ടര്‍ അഭ്യര്‍ഥിച്ചു.
കഴിഞ്ഞ ദിവസം മന്ത്രി കടകംപള്ളി സുരേന്ദ്രന്റെ അധ്യക്ഷതയില്‍ ചേര്‍ന്ന യോഗത്തില്‍ ഗ്രാമ-ബ്ലോക്ക്പഞ്ചായത്ത് പ്രസിഡന്റുമാര്‍ പദ്ധതി വിജയിപ്പിക്കുന്നതിന് പൂര്‍ണപിന്തുണ വാഗ്ദാനം ചെയ്തിരുന്നു. ജില്ലയില്‍ വെള്ളക്കെട്ടുള്ള പ്രദേശങ്ങളിലും നിര്‍മാണസാമഗ്രികള്‍ കൊണ്ടുപോകുന്നതിന് പ്രയാസമുള്ള സ്ഥലങ്ങളിലും സര്‍ക്കാര്‍ സഹായം കൊണ്ടുമാത്രം ശൗചാലയ നിര്‍മാണം നടക്കില്ലെന്ന് യോഗത്തില്‍ വിലയിരുത്തലുണ്ടായി.
ഈ സാഹചര്യത്തിലാണ് കലക്ടര്‍ മുന്‍കൈയെടുത്ത് വിവിധ സ്ഥാപനപ്രതിനിധികളുടെ യോഗം കളക്ടറേറ്റില്‍ വിളിച്ചുചേര്‍ത്തത്. ജനോപകാരപ്രദമായ പദ്ധതികളോട് സ്ഥാപനങ്ങളും വ്യക്തികളും ഏറെ താല്‍പര്യം കാണിക്കുമെന്ന് കലക്ടര്‍ പ്രത്യാശ പ്രകടിപ്പിച്ചു. പദ്ധതിക്കായി ഫണ്ട് സ്വരൂപിക്കുന്നതിന് കര്‍മപരിപാടിക്കും യോഗം രൂപം നല്‍കി.