കൊയിലാണ്ടി: യാത്രക്കാരെ ഇറക്കാനായി നിര്‍ത്തിയ ബസിനെ ഇടതുവശത്തുകൂടെ അപകടകരമായി മറികടന്ന ബസിന്റെ ഡ്രൈവറുടെ ലൈസന്‍സ് സസ്‌പെന്‍ഡ് ചെയ്തു. വടകരകൊയിലാണ്ടി റൂട്ടില്‍ ഓടുന്ന 'ചിന്നൂസ്' ബസിന്റെ ഡ്രൈവറും നടത്തിപ്പുകാരനുമായ വടകര സ്വദേശി ബൈജുവിന്റെ ലൈസന്‍സാണ് ആര്‍.ടി.ഒ അധികൃതര്‍ ആറുമാസത്തേക്ക് സസ്‌പെന്‍ഡ് ചെയ്തത്. ഇയാള്‍ക്കെതിരെ പൊലിസ് കേസെടുത്തിട്ടുമുണ്ട്.

കഴിഞ്ഞ ദിവസമായിരുന്നു സംഭവം. കോഴിക്കോട് കൊയിലാണ്ടി ദേശീയപാതയില്‍ ശോഭിക ടെക്‌സ്‌റ്റൈല്‍സിന് സമീപം യാത്രക്കാരെ ഇറക്കാനായി ഒരു ബസ് നിര്‍ത്തുന്നു. ഒരു യാത്രക്കാരി ഇറങ്ങി രണ്ട് ചുവട് വെച്ചപ്പോഴേക്കും നിര്‍ത്തിയിട്ട ബസിന്റെ ഇടതുവശത്തുകൂടി ചിന്നൂസ് എന്ന ബസ് അതിവേഗതയില്‍ വരുന്നു. സ്ത്രീ പെട്ടെന്ന് പിന്നോട്ടു വലിഞ്ഞതിനാല്‍ രക്ഷപ്പെട്ടു.

ഭയന്ന ഇവരെ മറ്റൊരു സ്ത്രീ ആശ്വസിപ്പിച്ച് റോഡരികിലേക്ക് മാറ്റുകയായിരുന്നു. നിര്‍ത്തിയ ബസില്‍നിന്ന് യാത്രക്കാര്‍ ഇറങ്ങുമെന്ന് അറിയാമായിരുന്നിട്ടും പിന്നിലെ ബസിലെ ഡ്രൈവര്‍ അപകടയോട്ടം നടത്തുകയായിരുന്നു. ഇതിന്റെ ദൃശ്യങ്ങള്‍ പുറത്തുവന്നതോടെ അധികൃതര്‍ നടപടിയെടുക്കുകയായിരുന്നു. യാത്രക്കാരി ഇറങ്ങിയ ബസും നിയമം ലംഘിച്ച് റോഡിലാണ് നിര്‍ത്തിയത്.