ദുബൈ: രാജ്യാന്തര പുസ്തകമേളക്ക് ഇന്ന് തിരശ്ശീല വീഴുന്നു. ഷാര്‍ജയിലെ പുസ്തകമേളയ്ക്കായി ലക്ഷക്കണക്കിനാളുകളാണ് ഇതുവരേ എത്തിയത്. 41ാമത് പുസ്തകമേളയ്ക്കാണ് ഇന്ന് സമാപനം കുറിക്കുന്നത്. ഇത്തവണയും മേളയില്‍ മലയാളം സജീവ സാന്നിധ്യമാണ്. ഷാര്‍ജ ഭരണാധികാരി ശൈഖ് ഡോ. സുല്‍ത്താന്‍ ബിന്‍ മുഹമ്മദ് അല്‍ ഖാസിമി രണ്ടിന് ഉദ്ഘാടനം ചെയ്ത മേളയില്‍ നിരവധി പുസ്തകങ്ങളാണ് പ്രകാശിതമായത്. എക്സ്പോയില്‍ ഏഴാം ഹാളില്‍ മലയാളത്തിന്റെ ആരവങ്ങളാണുയരുന്നത്. ഇവിടുത്തെ റൈറ്റേഴ്‌സ് ഫോറത്തില്‍ ഏതാണ്ട് 300 മലയാളം പുസ്തകങ്ങള്‍ പ്രകാശിതമായി. കെ.പി രാമനുണ്ണി, ശിഹാബുദ്ദീന്‍ പൊയ്ത്തുംകടവ്, അംബികാസുതന്‍ മങ്ങാട്, വീരാന്‍ കുട്ടി, സൂറാബ്, ശൈലന്‍ തുടങ്ങി മലയാള സാഹിത്യ രംഗത്തെ പ്രമുഖര്‍ വിവിധ ചടങ്ങുകളില്‍ സജീവമായി. വാക്ക് പ്രചരിപ്പിക്കുക എന്ന പ്രമേയത്തില്‍ നടന്ന പുസ്തകമേളയുടെ അവസാന ദിവസമായ ഇന്ന് നഗരിയിലേക്ക് ജനപ്രവാഹമാണ്.