വാഹന നിര്‍മ്മാണ രംഗത്തെ അതികായന്മാര്‍ക്കൊപ്പം സ്റ്റാര്‍ട്ടപ്പ് കമ്പനികളും ഇന്ത്യന്‍ മാര്‍ക്കറ്റില്‍ അരങ്ങ് തകര്‍ക്കുകയാണ്. പ്രത്യേകിച്ചും ഇലക്ട്രിക്ക് ഇരുചക്ര വാഹന രംഗത്ത് ലോകത്തെ ഏറ്റവും മത്സരാധിഷ്ഠിതമായ വിപണിയായി ഇന്ത്യ മാറിക്കൊണ്ടിരിക്കുകയാണ്. ഇപ്പോള്‍
അഹമ്മദാബാദ് ആസ്ഥാനമായുള്ള ഇലക്ട്രിക് ഇരുചക്ര വാഹന സ്റ്റാര്‍ട്ടപ്പ് കമ്പനിയായ സ്വിച്ച് മോട്ടോകോര്‍പ്പിന്റെ പുതിയ CSR 762, ഇന്ത്യന്‍ മാര്‍ക്കറ്റിലേക്ക് അവതരിക്കാനൊരുങ്ങുകയാണ്. സ്‌റ്റൈലിഷ് ഡിസൈനിലും മികച്ച റേഞ്ചിലും പുറത്തിറങ്ങുന്ന ഈ ഇ.വി ഇന്ത്യന്‍ മാര്‍ക്കറ്റിനെ പിടിച്ചു കുലുക്കുമെന്നാണ് കമ്പനി അവകാശപ്പെടുന്നത്.

ഇന്ത്യയില്‍ ഈ ഇലക്ട്രിക് മോട്ടോര്‍സൈക്കിളിന്റെ ലോഞ്ച് 90 ദിവസത്തിനുള്ളില്‍ നടക്കുമെന്നാണ് സ്വിച്ച് മോട്ടോകോര്‍പ് പറയുന്നത്. അതിനുശേഷം അടുത്ത വര്‍ഷം (2024) തുടക്കത്തോടെ CSR 762 ഇവിക്കായുള്ള ഡെലിവറി ആരംഭിക്കാനുമാണ് ബ്രാന്‍ഡിന്റെ ലക്ഷ്യം. 100 കോടി രൂപയിലധികം മുതല്‍ മുടക്കിലാണ് തങ്ങളുടെ പുതിയ ഇലക്ട്രിക് ബൈക്ക് വികസിപ്പിച്ചെടുത്തതെന്നും 'ഗുണനിലവാരത്തിലും പെര്‍ഫോമന്‍സിലും ഉയര്‍ന്ന നിലവാരം പുലര്‍ത്തുന്ന തരത്തില്‍ സൂക്ഷ്മമായി തന്നെയാണ് വാഹനം രൂപകല്പന ചെയ്തിരിക്കുന്നതെന്നും ബ്രാന്‍ഡ് പറയുന്നു.

ഏകദേശം 13.4 bhp പീക്ക് പവര്‍ ഔട്ട്പുട്ടുള്ള 3 കിലോവാട്ട് പിഎംഎസ് ഇലക്ട്രിക് മോട്ടോറാണ് സ്വിച്ച് CSR 762 ഇലക്ട്രിക് മോട്ടോര്‍സൈക്കിളില്‍ കമ്പനി നല്‍കിയിരിക്കുന്നത്. മണിക്കൂറില്‍ പരമാവധി 160 കി.മീ സഞ്ചരിക്കാന്‍ സാധിക്കുന്ന ബൈക്കിന് കമ്പനി 160 കി.മീ റേഞ്ച് ലഭിക്കുമെന്നാണ് അവകാശപ്പെടുന്നത്.രണ്ട് ബാറ്ററി പായ്ക്കുകള്‍ ഉള്ള വാഹനത്തിന് 40 ലിറ്റര്‍ ബൂട്ട് സ്‌പേസ്, മൊബൈല്‍ ചാര്‍ജര്‍, പൂര്‍ണമായി കവര്‍ ചെയ്ത മൊബൈല്‍ ഹോള്‍ഡര്‍ എന്നിവയുള്‍പ്പെടെ നിരവധി ശ്രദ്ധേയമായ സവിശേഷതകളും ഉണ്ട്.

Content Highlights:svitch csr 762 electric motorcycle details