കൊച്ചി: ഐ.എസ്.എല്ലില്‍ വിജയവഴിയില്‍ തിരിച്ചെത്തി കേരള ബ്ലാസ്‌റ്റേഴ്‌സ്. കൊച്ചിയില്‍ ഒന്നിനെതിരേ മൂന്നു ഗോളുകള്‍ക്കായിരുന്നു ബ്ലാസ്‌റ്റേഴ്‌സിന്റെ ജയം. അഡ്രിയാന്‍ ലൂണ, ദിമിത്രിയോസ് ഡയമന്റക്കോസ്, ഇവാന്‍ കലിയുഷ്‌നി എന്നിവരാണ് ബ്ലാസ്‌റ്റേഴ്‌സിനായി സ്‌കോര്‍ ചെയ്തത്.

42ാം മിനുറ്റില്‍ സഹല്‍ നല്‍കിയ പാസ് അനായാസമായി ഗോള്‍ വല കടത്തി ആദ്യം ലൂണ ബ്ലാസ്‌റ്റേഴ്‌സിനെ മുന്നിലെത്തിച്ചു. വെറും മൂന്ന് മിനിറ്റിന് ശേഷം അന്‍വര്‍ അലി ബോക്‌സിനുള്ളില്‍ ദിമിത്രിയോസിനെ ഫൗള്‍ ചെയ്തതിന് ലഭിച്ച പെനാല്‍റ്റി ലക്ഷ്യം കണ്ട് ദിമിത്രിയോസ് കൊമ്പന്മാരുടെ ലീഡ് രണ്ടാക്കി ഉയര്‍ത്തി.

52ാം മിനുറ്റില്‍ ഇവാന്‍ കലുയ്ഷ്‌നിയുടെ വെടിക്കെട്ട് ഷോട്ട് ഗോവന്‍ കീപ്പര്‍ ധീരജിനെ മറികടന്ന് പോസ്റ്റിലെത്തി. ബ്ലാസ്‌റ്റേഴ്‌സിന്റെ ഗോള്‍ നില മൂന്നായതോടെ തിരിച്ചുവരവിനായി ഗോവ ശ്രമിക്കുകയും നോവ സദോയിലൂടെ ഗോവ ഒരു ഗോള്‍ തിരിച്ചടിക്കുകയും ചെയ്തു. ജയത്തോടെ 6 മത്സരങ്ങളില്‍ നിന്ന് 9 പോയിന്റുമായി ബ്ലാസ്‌റ്റേഴ്‌സ് 5ാം സ്ഥാനത്താണ്. 5 കളികളില്‍ നിന്ന് 9 പോയിന്റുള്ള ഗോവ 4ാം സ്ഥാനത്താണ്.