സന്ദര്‍ശകര്‍ക്കും ബയോമെട്രിക് ചെക്ക് ഇന്‍ സേവനം ദുബൈ: ഇനി മുതല്‍ ദുബൈയിലെത്തുന്ന സന്ദര്‍ശകര്‍ക്കും ബയോമെട്രിക് ചെക്ക് ഇന്‍ സേവനം ലഭ്യമാവും. യു.എ.ഇയിലെ താമസവിസക്കാര്‍ക്കും ജി.സി.സി പൗരന്മാര്‍ക്കും മാത്രം ഇതുവരേ ലഭ്യമായിരുന്ന സംവിധാനമാണ് സന്ദര്‍ശക വിസക്കാര്‍ക്കും ഇനി പ്രയോജനപ്പെടുക. എമിറേറ്റ്‌സ് എയര്‍ലൈന്‍സാണ ഇക്കാര്യം അറിയിച്ചത്. ബയോമെട്രിക് തിരിച്ചറിയല്‍ സാങ്കേതികവിദ്യപ്രകാരം ദുബൈ ഇന്റര്‍നാഷണല്‍ എയര്‍പോര്‍ട്ട് ടെര്‍മിനല്‍ മൂന്നിലെ ചെക്ക് ഇന്‍, ലോഞ്ചുകള്‍, ബോര്‍ഡിംഗ്, ഇമിഗ്രേഷന്‍ എന്നിവയിലൂടെ അതിവേഗത്തില്‍ യാത്രക്കാര്‍ക്ക് സഞ്ചരിക്കാനാവും. ഇതു സംബന്ധിച്ച കരാറില്‍ ദുബൈ ജി.ഡി.ആര്‍.എഫ്.എ ഡയറക്ടര്‍ ജനറല്‍ ലെഫ്റ്റനന്റ് ജനറല്‍ മുഹമ്മദ് അഹമ്മദ് അല്‍ മര്‍റിയും എമിറേറ്റ്സിന്റെ ചീഫ് ഓപ്പറേറ്റിംഗ് ഓഫീസര്‍ അദേല്‍ അല്‍ റെദയും കരാറില്‍ ഒപ്പുവച്ചു.