പൊന്നാനി: പൊന്നാനി ആര്‍.ടി.ഒയ്ക്കു കീഴിലെ വാഹന രജിസ്‌ട്രേഷനും ഫിറ്റ്‌നസ് പരിശോധനയും റോഡരികില്‍ നടത്തുന്നതു ഗതാഗത തടസമുണ്ടാക്കുന്നതായി പ്രദേശവാസികളുടെ പരാതി. പൊന്നാനി താലൂക്കിലെ റോഡ് ട്രാന്‍സ്‌പോര്‍ട്ട് വിഭാഗത്തിനു കീഴിലെ വാഹന രജിസ്‌ട്രേഷന്‍ ആനപ്പടി പ്രദേശത്താണ് നടക്കുന്നത്.
രാവിലെ ഒന്‍പതു മുതല്‍ രജിസ്‌ട്രേഷന്‍ ആരംഭിക്കും. ആനപ്പടി പെട്രോള്‍ പമ്പ് മുതല്‍ സ്‌കൂള്‍വരെ നൂറുകണക്കിന് വാഹനങ്ങളാണ് റോഡിന്റെ ഇരുവശവും നിര്‍ത്തിയിടുന്നത്. റോഡിനരികിലുള്ള വീട്ടുകാര്‍ക്ക് വാഹനവുമായി പുറത്തുപോകാന്‍ കഴിയാത്ത  സ്ഥിതിയാണെന്നും പരാതിയുണ്ട്. ഇന്നലെ ആശുപത്രിയിലെത്തിക്കേണ്ട അത്യാസന്ന നിലയിലുള്ള രോഗിയെ മണിക്കൂറുകള്‍ കഴിഞ്ഞാണ്  ആശുപത്രിയില്‍ എത്തിക്കാനായത്. വീടിന്റെ മുന്നില്‍ നിര്‍ത്തിയിട്ട വാഹനത്തില ഡ്രൈവര്‍ ദൂരെയായതാണ്  കാരണം.
വിഷയത്തില്‍ പരിഹാരം കാണണമെന്നാവശ്യപ്പെട്ട് ബന്ധപ്പെട്ട വകുപ്പ് അധികൃതരെ നാട്ടുകാര്‍ കണ്ടിരുന്നെങ്കിലും നടപടി ഉണ്ടായിട്ടില്ല. പ്രദേശവാസികളുടെ പ്രയാസം പരിഹരിക്കാനുള്ള നടപടിയെടുക്കുമെന്നും സ്ഥല പരിമിതിമൂലമാണ് ഇവിടെ രജിസ്‌ട്രേഷന്‍ നടക്കുന്നതെന്നും പൊന്നാനി ട്രാന്‍സ്‌പോര്‍ട്ട് ഓഫിസര്‍ പറഞ്ഞു.