ദോഹ: ലോകകപ്പ് ഫുട്‌ബോളിലെ ഖത്തര്‍ വിമര്‍ശനത്തില്‍ പാശ്ചാത്യ രാജ്യങ്ങള്‍ക്കെതിരെ തുറന്നടിച്ച് ഫിഫ പ്രസിഡന്റ് ജിയാന്നി ഇന്‍ഫാന്റിനോ. ഖത്തറിനെ ധാര്‍മികത പഠിപ്പിക്കുന്ന പാശ്ചാത്യ രാജ്യങ്ങളുടെ രീതി കാപട്യമാണ്. യൂറോപ്യന്‍ മാധ്യമങ്ങള്‍ ഏകപക്ഷീയമായി വാര്‍ത്തകള്‍ മെനയുകയാണ്. കഴിഞ്ഞ 3,000 വര്‍ഷങ്ങളില്‍ യൂറോപ്യന്മാര്‍ ചെയ്ത തെറ്റുകള്‍ക്ക് മാപ്പിരന്നിട്ട് വേണം മറ്റുള്ളവരെ ധാര്‍മികത പഠിപ്പിക്കാനെന്നും ഇന്‍ഫാന്റിനോ പറഞ്ഞു.

'ആളുകള്‍ക്ക് ധാര്‍മിക പാഠങ്ങള്‍ പകര്‍ന്നു നല്‍കും മുമ്പ്, നമ്മള്‍ യൂറോപ്പുകാര്‍ കഴിഞ്ഞ 3000 വര്‍ഷംകൊണ്ട് ചെയ്തുകൂട്ടിയ കാര്യങ്ങള്‍ക്ക് അടുത്ത 3000 വര്‍ഷംകൊണ്ട് ക്ഷമാപണം നടത്തേണ്ടിയിരിക്കുന്നു' ഖത്തര്‍ ലോകകപ്പിനെതിരെ തുടര്‍ച്ചയായി വിമര്‍ശനങ്ങള്‍ അഴിച്ചുവിടുന്ന യൂറോപ്യന്‍ മാധ്യമങ്ങളുടെ പ്രാചാരണങ്ങള്‍ക്കെതിരെ അദ്ദേഹം രൂക്ഷഭാഷയില്‍ തുറന്നടിച്ചു.