തിരൂരങ്ങാടി: വിദ്യാര്‍ഥികള്‍ക്ക് പാഠപുസ്തകം എത്താത്തതിനെത്തുടര്‍ന്നു മുസ്‌ലിം യൂത്ത് ലീഗ് പാഠപുസ്തകങ്ങള്‍ വിതരണം ചെയ്തു. കൊടിഞ്ഞി ജി.എം.യു.പി സ്‌കൂളിലെ പുസ്തകം ലഭിക്കാത്ത വിദ്യാര്‍ഥികള്‍ക്കാണു നന്നമ്പ്ര പഞ്ചായത്ത് യൂത്ത് ലീഗ് പ്രവര്‍ത്തകര്‍ പാഠപുസ്തകത്തിന്റെ ഫോട്ടോസ്റ്റാറ്റ് കോപ്പി വിതരണം ചെയ്തത്.
നാല്, അഞ്ച്, ഏഴ് ക്ലാസുകളിലെ പാഠപുസ്തകങ്ങളുടെ കോപ്പികളാണു വിതരണം ചെയ്തത്. സ്‌കൂളിലെ വിവിധ ക്ലാസ്സുകളിലുള്ള അമ്പതോളം വിദ്യാര്‍ഥികള്‍ക്ക് ഇതു വരെ പുസ്തകങ്ങള്‍ ലഭിച്ചിരുന്നില്ല. ഓണപ്പരീക്ഷ അടുത്ത ദിവസം തുടങ്ങാനിരിക്കുന്ന സാഹചര്യത്തിലാണ് മുസ്‌ലിം യൂത്ത് ലീഗ് കമ്മിറ്റി പാഠപുസ്തകത്തിന്റെ കോപ്പികള്‍ വിതരണം നടത്തിയത്.
സംസ്ഥാനത്തെ എല്ലാ വിദ്യാര്‍ഥികള്‍ക്കും പാഠപുസ്തകം നല്‍കിയിട്ടുണ്ടെന്നും ഇല്ലാത്തവയുടെ കണക്കെടുത്ത് വരികയാണെന്നുമാണു വിദ്യാഭ്യാസ മന്ത്രി പറഞ്ഞത്. ഈ സാഹചര്യത്തില്‍ പുസ്തകം എത്താന്‍ വൈകുന്നതു കണക്കിലെടുത്താണു യൂത്ത് ലീഗ് പുസ്തക വിതരണം നടത്തിയത്. സ്‌കൂളിലെ പ്രഥാമിക ആവശ്യമായ പാഠപുസ്തകം പോലും എത്തിക്കാന്‍ കഴിയാത്ത വിദ്യാഭ്യാസ വകുപ്പ് മന്ത്രി രാജി വെക്കണമെന്ന് യൂത്ത് ലീഗ് പ്രവര്‍ത്തകര്‍ ആവശ്യപ്പെട്ടു. നന്നമ്പ്ര പഞ്ചായത്ത് മുസ്‌ലിം യൂത്ത് ലീഗ് പ്രസിഡന്റ് യു.എ റസാഖ്, ഹക്കീം മൂച്ചിക്കല്‍, വി.കെ ഷാഹുല്‍, ടി.സി കരീം, വി.കെ ഇബ്രാഹീം, കരുവാട്ടില്‍ അഷ്‌റഫ്, വി.കെ അന്‍വ്വര്‍, വി.കെ സ്വാലിഹ്  നേതൃത്വം നല്‍കി.