അഹമ്മദാബാദ്: നിയമസഭാ തെരഞ്ഞെടുപ്പ് നടക്കുന്ന ഗുജറാത്തിൽ മുസ്ലിം ഭൂരിപക്ഷ മണ്ഡലങ്ങളിലെല്ലാം സ്ഥാനാർഥികളെ നിർത്തരുതെന്ന് മജ്‌ലിസേ ഇത്തിഹാദുൽ മുസ്ലിമീന്റെ നേതാക്കൾ. ഒരുവിഭാഗം മജ്‌ലിസ് നേതാക്കൾ ഇക്കാര്യം പാർട്ടി അധ്യക്ഷൻ അസദുദ്ദീൻ ഉവൈസി ഉൾപ്പെടെയുള്ളവരോട് ആവശ്യപ്പെട്ടു.

എല്ലാ മുസ്ലിം ഭൂരിപക്ഷ മണ്ഡലങ്ങളിലും പാർട്ടി ശക്തമല്ല. ചിലസ്ഥലങ്ങളിൽ മാത്രമാണ് സ്വാധീനമുള്ളത്. അവിടെ മാത്രം മത്സരിക്കുന്നതാവും നല്ലത്. പരാജയപ്പെടുമെന്ന് സാധ്യതയുള്ള മണ്ഡലങ്ങളിൽ മത്സരിക്കരുത്- നേതാക്കൾ അഭ്യർഥിച്ചു. ഗുജറാത്തിലെ പ്രധാന മജ്‌ലിസ് നേതാവും ഗോധ്ര കൗൺസിലറുമായ ഫൈസൽ സുജേല ഇക്കാര്യം ചൂണ്ടിക്കാട്ടി കത്തയക്കുകയും ചെയ്തു.

വിജയ സാധ്യത കുറഞ്ഞ ഗോധ്രയിൽ സ്ഥാനാർഥികളെ നിർത്തുന്നത് ബി.ജെ.പിയെ പോലുള്ള കക്ഷികളെ സഹായിക്കലാവും. സ്ഥാനാർഥികളെ നിർത്തുന്നതിനപ്പുറം 2027ലെ തെരഞ്ഞെടുപ്പ് മുന്നിൽക്കണ്ടുള്ള പവർത്തനമാകണം പാർട്ടി ചെയ്യേണ്ടത്. ഈ അപേക്ഷ അനുസരിച്ചില്ലെങ്കിൽ പാർട്ടി ഗോധ്രയിൽ പിളരുമെന്ന് ഞാൻ ഭ യക്കുന്നു- ഫൈസൽ ചൂണ്ടിക്കാട്ടി.

കച്ചിലെ മാണ്ഡ്വിയിൽ സ്ഥാനാർഥിയെ നിർത്തിയാൽ പാർട്ടിയിൽ നിന്ന് രാജിവയ്ക്കുമെന്ന് മജിലിസ് നേതാവ് മുഹ്‌സിൻ ഹിൻഗോർജ മുന്നറിയിപ്പ് നൽകിയതായുള്ള കത്ത് മസൂഹമാധ്യമങ്ങളിൽ പ്രചരിക്കുന്നുണ്ട്. എന്നാൽ, ഇത്തരം ആവശ്യങ്ങൾ എല്ലാ കാലത്തും പാർട്ടിയിൽ ഉണ്ടാവാറുണ്ടെന്നാണ് എ.എ.പി സംസ്ഥാന വക്താവ് ഡീനിഷ് ഖുറേശി പ്രതികരിച്ചത്.

അതേസമയം, പാർട്ടിയുടെ സാന്നിധ്യം എതിർ പാർട്ടിക്കാർക്ക് സഹായകരമാകുമെന്ന അഭിപ്രായങ്ങൾക്കിടെ അഹമ്മദാബാദിൽ മജ്‌ലിസ് സ്ഥാനാർഥിയെ പിൻവലിച്ചു. കോൺഗ്രസിന്റെ ഹിമ്മത് സിങ്ങിന് വിജയസാധ്യതയുള്ള ഇവിടെ ഷാനവാസ് പത്താനെയായിരുന്നു മജ്‌ലിസ് നിർത്തിയത്.

രണ്ടു ഘട്ടങ്ങളിലായി നടക്കുന്ന തെരഞ്ഞെടുപ്പ് ഡിസംബർ ഒന്നിനും അഞ്ചിനും നടക്കും. ഇതിനകം 24 മണ്ഡലങ്ങളിലാണ് മജ്‌ലിസ് സ്ഥാനാർഥികളെ നിർത്തുന്നത്.

AIMIM local leaders against contesting all Muslim-dominated seats in Gujarat