മലപ്പുറം: സ്‌കൂളുകളുടെ പ്രവൃത്തി ദിവസത്തില്‍ കണ്‍ഫ്യൂഷന്‍ തീരാതെ വിദ്യാര്‍ഥികളും അധ്യാപകരും. ജില്ലയില്‍ ഇന്ന് പി.എസ്.സി പരീക്ഷ നടക്കുന്ന സ്‌കൂ ളുകളിലെ അധ്യാപകരും വിദ്യാര്‍ഥികളുമാണ് ഇന്നത്തെ സ്‌കൂള്‍ അവധിയില്‍ വ്യക്തതയില്ലാതിരുന്നത് മൂലം നട്ടംതിരിഞ്ഞത്.
പി.എസ്.സി പരീക്ഷ നടക്കുന്ന വിദ്യാലയങ്ങള്‍ക്കൊഴികെ സംസ്ഥാനത്തെ എല്ലാ വിദ്യാലയങ്ങള്‍ക്കും ഇന്ന് പ്രവൃത്തി ദിവസമായി നേരത്തെ പ്രഖ്യാപനമുണ്ടായിരുന്നു. ഇതിന്റെ അടിസ്ഥാനത്തില്‍ ഇന്ന് പി.എസ്.സി പരീക്ഷ നടക്കുന്ന സ്‌കൂളുകളിലെ അധ്യാപകര്‍ വിദ്യാര്‍ഥികള്‍ക്ക് അവധി നല്‍കുകയും ചെയ്തു. എന്നാല്‍ ഇതിനുശേഷം ഇന്നലെ വൈകുന്നേരം വിദ്യാഭ്യാസ ഡയറക്ടറുടെ പുതിയ ഇത്തരവിറങ്ങിയതാണ് വിദ്യാര്‍ഥികളെയും അധ്യാപകരെയും വലച്ചത്. ജില്ലയില്‍ പി.എസ്.സി പരീക്ഷ നടക്കുന്ന സ്‌കൂളുകളില്‍ ഇന്ന് ഉച്ചവരെ നിര്‍ബന്ധമായും ക്ലാസുകള്‍ നടത്തണമെന്നായിരുന്നു വിദ്യാഭ്യാസ ഉപഡയറക്ടറുടെ ഉത്തരവ്. എന്നാല്‍ ഈ ഉത്തരവിറങ്ങിയപ്പോഴേക്കും പല സ്‌കൂളുകളും വിട്ട് വിദ്യാര്‍ഥികള്‍ വീട്ടിലെത്തിയിരുന്നു. ഉച്ചവരെ ക്ലാസുണ്ടെന്ന വിവരം വിദ്യാര്‍ഥികളെ അറിയിക്കാന്‍ അധ്യാപകര്‍ പാടുപെട്ടു.