പ്രയാഗ്‌രാജ്: ഉത്തര്‍ പ്രദേശില്‍ അജ്ഞാത രോഗത്തെ തുടര്‍ന്ന് 170 കുട്ടികളെ ആശുപത്രിയില്‍ പ്രവേശിപ്പിച്ചു.
പ്രയാഗ് രാജിലെ മോത്തിലാല്‍ നെഹ്‌റു ആശുപത്രിയിലാണ് വൈറല്‍ പനിയോടെ കുട്ടികളെ പ്രവേശിപ്പിച്ചത്. ന്യൂമോണിയ, മസ്തിഷ്‌ക ജ്വരം തുടങ്ങിയ ലക്ഷണങ്ങളും പ്രകടിപ്പിക്കുന്നുണ്ട്. എല്ലാവരും ഓക്‌സിജന്‍ സഹായത്തോടെയാണ് കഴിയുന്നതെന്ന് അധികൃതര്‍ അറിയിച്ചു. ഈയിടെയാണ് കുട്ടികളില്‍ രോഗം പടര്‍ന്നത്.
ആശുപത്രിയില്‍ 120 ബെഡുകളുള്ള വാര്‍ഡില്‍ 171 കുട്ടികളെയാണ് പ്രവേശിപ്പിച്ചത്. ഡെങ്കിപ്പനിയെന്നാണ് തുടക്കത്തില്‍ ഡോക്ടര്‍മാര്‍ കരുതിയത്. ഒന്നിലധികം പേരാണ് ഒരേ കിടക്കയില്‍ ഉണ്ടായിരുന്നത്. ഓക്‌സിജന്‍ നില കുറഞ്ഞതോടെയാണ് രോഗത്തിന്റെ ഗൗരവം ഡോക്ടര്‍മാര്‍ക്ക് മനസിലായത്.

200 ഓളം കിടക്കകളുള്ള വാര്‍ഡ് നിര്‍മിക്കാനുള്ള നടപടികള്‍ ആരംഭിച്ചിട്ടുണ്ട്. പ്രളയ ബാധിത പ്രദേശങ്ങളില്‍ നിന്നാണ് കൂടുതല്‍ കേസുകളും റിപ്പോര്‍ട്ടു ചെയ്തത്. എന്നാല്‍ ആശുപത്രിയില്‍ പ്രവേശിപ്പിച്ച കുട്ടികളുടെ കാര്യത്തില്‍ അധികൃതര്‍ ശ്രദ്ധ പുലര്‍ത്തുന്നില്ലെന്ന് ചികിത്സയില്‍ കഴിയുന്ന കുട്ടികളിലൊരാളുടെ പിതാവ് നരേന്ദ്ര കുമാര്‍ പറഞ്ഞു. ആശുപത്രിയില്‍ നിന്നാണ് തന്റെ കുഞ്ഞിന് രോഗം പകര്‍ന്നതെന്നും അദ്ദേഹം പറഞ്ഞു.