ഗുരുവായൂര്‍: ഗുരുവായൂര്‍ അമ്പലത്തില്‍ നവദമ്പതികളുടെ ഫോട്ടോഷോട്ടിനിടെ ആനയിടഞ്ഞു. കൊമ്പനാന പാപ്പാന്റെ മുണ്ടുരിഞ്ഞ് തുമ്പിക്കൈയ്യില്‍ ചുറ്റിയെറിഞ്ഞു.ഈ മാസം 10ാം തിയതി നടന്ന സംഭവത്തിന്റെ ദൃശ്യങ്ങള്‍ വിവാഹ പാര്‍ട്ടിയുടെ ക്യാമറയില്‍ പതിഞ്ഞിരുന്നെങ്കിലും ഇപ്പോഴാണ് പുറത്തുവരുന്നത്. ആനയുടെ ആക്രമണത്തില്‍ നിന്നും അത്ഭുതകരമായാണ് പാപ്പാന്‍ രക്ഷപെട്ടത്. ശീവേലി കഴിഞ്ഞ് ആനയെ പുറത്തേക്ക് എഴുന്നള്ളിക്കുന്നതിനിടെ നവദമ്പതികള്‍ ഷൂട്ടിങ്ങിനായി ആനയുടെ മുന്നില്‍ എത്തിയിരുന്നു.ഗുരുവായൂര്‍ ദേവസ്വത്തിന്റെ ദാമോദര്‍ദാസ് എന്ന ആനയാണ് ഇടഞ്ഞത്.

ആനയുടെ സമീപത്തുകൂടെ വരനും വധുവും നടന്നുവരുന്നത് ഫോട്ടോഗ്രാഫര്‍മാര്‍ ചിത്രീകരിച്ചതിനു പിന്നാലെ ആന വട്ടം തിരിഞ്ഞ് പാപ്പാനായ രാധാകൃഷ്ണനെ കാലില്‍ പൊക്കി എടുത്ത്, തുമ്പിക്കൈ കൊണ്ട് തൂക്കിയെടുക്കാന്‍ ശ്രമിക്കുകയായിരുന്നു. എന്നാല്‍, ആന പിടിച്ചത് രാധാകൃഷ്ണന്റെ തുണിലായതിനാല്‍ ഊര്‍ന്നു താഴേക്കു വീഴുന്നതും ഉടന്‍ തന്നെ ഓടി രക്ഷപ്പെടുന്നതും ദൃശ്യങ്ങളില്‍ കാണാം. ആന ഇടഞ്ഞതുകണ്ട് ദമ്പതികളും ഭയന്ന് ഓടിമാറുകയീയിരുന്നു. കല്യാണ ആഘോഷത്തിന്റെ വീഡിയോ നവമാധ്യമങ്ങള്‍ പോസ്റ്റ് ചെയ്തപ്പോഴാണ് പാപ്പാന്റെ അത്ഭുതകരമായ രക്ഷപ്പെടല്‍ പുറം ലോകം കണ്ടത്.ആനയുടെ മുകളിലും ഈ സമയം മറ്റൊരു പാപ്പാന്‍ ഉണ്ടായിരുന്നു. പെട്ടന്ന് തന്നെ ആന ശാന്തനായതിനാല്‍ ആര്‍ക്കും പരിക്കുകളില്ലാതെ രക്ഷപ്പെട്ടു.