ഫലസ്തീനോട് ഐക്യദാർഢ്യം; ദീപാവലിയും ക്രിസ്മസും ഉൾപ്പെടെയുള്ള ആഘോഷങ്ങൾ റദ്ദാക്കി ദുബൈയിലെ പ്രമുഖ സ്‌കൂൾ ഗ്രൂപ്പ്

ദുബൈ: ഫലസ്തീൻ ജനതയുടെ ദുരിതത്തോട് ഐക്യപ്പെട്ട് ആഘോഷ പരിപാടികൾ താൽക്കാലികമായി നിർത്തിവച്ചതായി ജെംസ് എഡ്യൂക്കേഷൻ ഗ്രൂപ്പ് അറിയിച്ചു. നിലവിൽ നടക്കുന്ന സംഘർഷം കണക്കിലെടുത്ത് അനുചിതമായതിനാൽ ആഘോഷ പരിപാടികൾ നടത്തേണ്ടെന്നാണ് തീരുമാനം. ഇതോടെ ദീപാവലി ഉൾപ്പെടെയുള്ള ആഘോഷങ്ങൾ ഒഴിവാക്കും.

ദീപാവലി, ക്രിസ്മസ് പരിപാടികൾ, വിന്റർ വണ്ടർലാൻഡ്‌സ് ഉൾപ്പെടെയുള്ള പാർട്ടികൾ, വർഷാവസാന, പുതുവത്സര ആഘോഷങ്ങൾ എന്നിവയാണ് റദ്ദാക്കിയത്. താങ്ക്സ്ഗിവിംഗ് ഇവന്റുകൾ അല്ലെങ്കിൽ പാർട്ടികൾ, മറ്റ് കമ്മ്യൂണിറ്റി ഇവന്റുകൾ അല്ലെങ്കിൽ ആഘോഷങ്ങൾ എന്നിവയും റദ്ദാക്കിയവയിൽ ഉൾപ്പെടുന്നു.

കൂടുതൽ അറിയിപ്പ് ഉണ്ടാകുന്നത് വരെ ഒരു തരത്തിലുമുള്ള ആഘോഷ പരിപാടികൾ നടത്തേണ്ടെന്നാണ് തീരുമാനം. വളരെ ശ്രദ്ധാപൂർവമായ പരിഗണനയ്ക്കും കൂടിയാലോചനയ്ക്കും ശേഷമാണ് അങ്ങനെ ചെയ്യാനുള്ള തീരുമാനം എടുത്തത് എന്ന് ജെംസ് എഡ്യൂക്കേഷൻ ഗ്രൂപ്പ് പറയുന്നു. ഒരു അന്താരാഷ്ട്ര വിദ്യാഭ്യാസ ദാതാവ് എന്ന നിലയിൽ നിലവിലെ സാഹചര്യങ്ങൾ കണക്കിലെടുക്കുമ്പോൾ ആഘോഷ സ്വഭാവമുള്ള സംഭവങ്ങൾ അനുചിതമാണെന്ന് ഞങ്ങൾ വിശ്വസിക്കുന്നു എന്ന് ജെംസ് എഡ്യൂക്കേഷൻ ഗ്രൂപ്പ് അധികൃതർ അറിയിച്ചു.

അതേസമയം, ദേശീയ പതാക ദിനം, അനുസ്മരണ ദിനവും യുഎഇ ദേശീയ ദിനവും പോലുള്ള ആഘോഷേതര സ്വഭാവമുള്ള ചടങ്ങുകൾ സ്‌കൂളിൽ നടക്കും. സ്‌പോർട്‌സ് ടൂർണമെന്റുകൾ, സ്‌കൂൾ നാടക നിർമ്മാണങ്ങൾ, ആഘോഷേതര സ്വഭാവമുള്ള പാഠ്യേതര പരിപാടികൾ എന്നിവ പോലുള്ള അക്കാദമിക്, പാഠ്യപദ്ധതി അടിസ്ഥാനമാക്കിയുള്ള ഇവന്റുകളും നടക്കും.

ദുബൈ ആസ്ഥാനമായി പ്രവർത്തിക്കുന്ന ജെംസ് എഡ്യൂക്കേഷൻ ലോകത്താകെയായി 60-ലധികം സ്കൂളുകൾ നടത്തുന്നുണ്ട്.

കൂടുതൽ ഗൾഫ് വാർത്തകൾ ലഭിക്കാൻ Whatsapp ഗ്രൂപ്പിൽ ജോയിൻ ചെയ്യുക: https://chat.whatsapp.com/BRPMYfzNHhY2483Sqrze5o