മതിലകം: ലഹരി വസ്തുക്കളുടെ ഉപയോഗം ഗണ്യമായി വര്‍ധിച്ചു വരുന്ന സാഹചര്യത്തില്‍ ലഹരിക്കെതിരെ ബോധവല്‍ക്കരണവുമായി മതിലകം ഒ.എല്‍.എഫ്.ജി.എച്ച്.എസിലെ വിദ്യാര്‍ഥിനികള്‍ തെരുവ് നാടകവുമായി രംഗത്തെത്തി.
വിദ്യാര്‍ഥികള്‍ക്കിടയിലും ലഹരി ഉപയോഗം വ്യാപകമാകുന്ന ഇന്നത്തെ സാഹചര്യത്തില്‍ അതിന് തടയിടുക എന്ന ലക്ഷ്യവുമായിട്ടാണ് വിദ്യാര്‍ഥിനികള്‍ തെരുവ് നാടകവുമായി മുന്നിട്ടിറങ്ങിയത്. ശ്രീനാരായണ പുരത്ത് നടന്ന ചടങ്ങില്‍ പി.ടി.എ പ്രസിഡന്റ് കെ.വൈ അസീസ് തെരുവ് നാടകം ഉദ്ഘാടനം ചെയ്തു.
പ്രധാന അധ്യാപിക ഇ.സി ജെസി അധ്യക്ഷയായി. പഞ്ചായത്തംഗം കെ.വി അജിത്ത്, സിസ്റ്റര്‍ ഹര്‍ഷ, അധ്യാപകരായ സാജു, ജ്വാല, റിക്‌സി, സല്‍മ, നിഷ എന്നിവര്‍ സംസാരിച്ചു. ലഘുലേഖകളും വിതരണം ചെയ്തു.