ബുർജ് ഖലീഫയിലെ പുതുവർഷ വെടിക്കെട്ട് കാണാൻ ടിക്കറ്റ് വേണം; നിരക്കുകൾ പ്രഖ്യാപിച്ചു, നവംബർ 10 മുതൽ ടിക്കറ്റെടുക്കാം

ദുബൈ: ലോകം ആവേശത്തോടെ കാത്തിരിക്കുന്ന പുതുവത്സര രാവിന് അധികം നാളുകളില്ല. ദുബൈയിൽ താമസിക്കുന്നവരും സന്ദർശിക്കുന്നവരും ഉറപ്പായും കാണണമെന്ന് ആഗ്രഹിക്കുന്നതാണ് ലോകത്തിലെ ഏറ്റവും വലിയ കെട്ടിടമായ ബുർജ് ഖലീഫയിൽ നടക്കുന്ന വെടിക്കെട്ട്. ബുർജ് പാർക്കിൽ നിന്നാണ് കൂടുതൽ പേരും ഈ ആഘോഷം വീക്ഷിക്കാറുള്ളത്. എന്നാൽ ബുർജ് പാർക്കിൽ നിന്ന് ബുർജ് ഖലീഫയുടെ ലോകപ്രശസ്തമായ പുതുവർഷ രാവ് വെടിക്കെട്ട് പ്രദർശനം കാണാനെത്തുന്ന താമസക്കാരും സന്ദർശകരും ഇനി ടിക്കറ്റ് വാങ്ങണം.

എമാറിന്റെ പുതുവത്സരാഘോഷം എല്ലാവർക്കും ആസ്വദിക്കാൻ വിവിധ ഇടങ്ങളിൽ നിന്നും സൗജന്യമായി വീക്ഷിക്കാം. എന്നാൽ മുൻനിരയായ ബുർജ് പാർക്കിൽ നിന്ന് കാണാൻ ടിക്കറ്റ് എടുക്കണം. മുതിർന്നവർക്കുള്ള ടിക്കറ്റിന് 300 ദിർഹമാണ് നിരക്ക്. 5 നും 12 നും ഇടയിൽ പ്രായമുള്ള കുട്ടികൾക്ക് പ്രവേശനത്തിന് 150 ദിർഹം ആണ് നൽകേണ്ടത്. എന്നാൽ 5 വയസ്സിന് താഴെയുള്ള കുട്ടികൾക്ക് സൗജന്യമായി ബുർജ് പാർക്കിൽ പ്രവേശിക്കാം.

നവംബർ 10 മുതൽ ടിക്കറ്റുകൾ വിൽപ്പനയ്‌ക്കെത്തും. ഓൺലൈൻ ആയി ടിക്കറ്റ് എടുത്ത് കഴിഞ്ഞാൽ, ഡിസംബർ 26 മുതൽ 30 വരെയുള്ള ദിവസങ്ങളിൽ ദുബൈ മാൾ, ദുബൈ ഹിൽസ് മാൾ, ദുബൈ മറീന മാൾ എന്നിവിടങ്ങളിൽ നിന്ന് ബാഡ്ജുകൾ വാങ്ങിക്കണം. ഉച്ചയ്ക്ക് 2 മണി മുതൽ രാത്രി 10 വരെ ബാഡ്ജുകൾ വാങ്ങാം. ബുർജ് പാർക്കിലേക്കുള്ള പ്രവേശനത്തിനും പ്രത്യേക പ്രദേശങ്ങളിലേക്കുള്ള പ്രവേശനത്തിനും ബാഡ്ജ് നിർബന്ധമാണ്.

ഓരോ ടിക്കറ്റിലും നിയുക്ത ഭക്ഷണശാലകളിൽ നിന്നുള്ള ഒരു ഭക്ഷണവും രണ്ട് പാനീയങ്ങളും ലഭിക്കും. വിവിധതരം ഫുഡ് ട്രക്കുകൾ, സ്റ്റാളുകൾ, തത്സമയ പ്രകടനങ്ങൾ, മറ്റ് സൗകര്യങ്ങൾ എന്നിവയും പാർക്കിലുണ്ടാകും. ബുർജ് പാർക്കിലേക്ക് വൈകുന്നേരം 4 മണി മുതൽ പ്രവേശിക്കാം. പുതുവർഷ ആഘോഷത്തിന്റെയും തത്സമയ വിനോദത്തിന്റെയും ഭക്ഷണത്തിന്റെയും തിരഞ്ഞെടുത്ത പാനീയങ്ങളുടെയും തടസ്സമില്ലാത്ത കാഴ്ചകൾ ടിക്കറ്റ് ഉറപ്പ് നൽകും.

കൂടുതൽ ഗൾഫ് വാർത്തകൾ ലഭിക്കാൻ Whatsapp ഗ്രൂപ്പിൽ ജോയിൻ ചെയ്യുക: https://chat.whatsapp.com/BRPMYfzNHhY2483Sqrze5o