വാടാനപ്പള്ളി: തൃത്തല്ലൂരില്‍ വീട്ടുമുറ്റത്ത് പാര്‍ക്ക് ചെയ്തിരുന്ന ഓട്ടോറിക്ഷ അജ്ഞാത സംഘം തീവച്ച് നശിപ്പിച്ചു. തൃത്തല്ലൂര്‍ പടിഞ്ഞാറ് ദുബായ് റോഡില്‍ താമസിക്കുന്ന ഇയ്യാനി ഞായക്കാട്ട് ഷജിലിന്റെ ഓട്ടോറിക്ഷയാണ് കഴിഞ്ഞ ദിവസം രാത്രി തീവച്ച് നശിപ്പിച്ചത്. രാത്രി പതിനൊന്നരയോടെ ഉറങ്ങാന്‍ കിടന്ന വീട്ടുകാര്‍ ജനലിലൂടെ വെളിച്ചം കണ്ടതിനെ തുടര്‍ന്ന് വാതില്‍ തുറന്നു നോക്കിയപ്പോയാണ് ഓട്ടോറിക്ഷ കത്തുന്നത് കണ്ടത്. ഓട്ടോയില്‍ മണ്ണെണ്ണ ഒഴിച്ചതിന്റെ പാടുകളും തീവക്കാനായി ഉപയോഗിച്ച തീപ്പെട്ടി കൊള്ളികളും സ്ഥലത്ത് നിന്ന് കണ്ടെത്തിയിട്ടുണ്ട്. ഷജിലിന്റെ വീടിന് സമീപമുള്ള മറ്റൊരു വീട്ടിലെ നിരീക്ഷണ കാമറയില്‍ നിന്ന് അക്രമി സംഘത്തെ കുറിച്ച് പൊലിസിന് സൂചന ലഭിച്ചു. ഓട്ടോ തൊഴിലാളി യൂനിയന്‍ സി.ഐ.ടി.യു വാടാനപ്പള്ളി യൂനിറ്റ് വൈസ് പ്രസിഡന്റാണ് ഷജില്‍.