6,000 പതാകകൾ കൊണ്ട് യുഎഇ നേതാക്കളുടെ ഛായാചിത്രം; പതാകദിനത്തിലെ ദുബൈ ബീച്ചിലെ അത്ഭുത വിഡിയോ കാണാം

ദുബൈ: രാജ്യത്തിന്റെ പതാക ദിനം ആഘോഷിച്ച് ദുബൈ. വിവിധ ഇടങ്ങളിൽ വിവിധ തരത്തിൽ ആഘോഷങ്ങൾ സംഘടിപ്പിച്ചപ്പോൾ ലോക ശ്രദ്ധ നേടിയ ഒരു പതാക ദിനാഘോഷം നടന്നത് ദുബൈയിലെ ഉമ്മു സുഖീം ബീച്ചിലായിരുന്നു. 6,000 പതാകകൾ കൊണ്ട് രാജ്യത്തിന്റെ നാല് നേതാക്കളുടെ ചിത്രമാണ് ഒരുക്കിയത്.

ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം, ഷെയ്ഖ് ഹംദാൻ, ഷെയ്ഖ് മക്തൂം, ഷെയ്ഖ് അഹമ്മദ് എന്നിവരുടെ ചിത്രങ്ങളാണ് പതാകകൊണ്ട് സൃഷ്ടിച്ചത്. 6,000 യുഎഇ പതാകകളാണ് ഇതിനായി ഉപയോഗിച്ചത്. കടൽതീരത്തെ മണലിൽ പതാകകൾ കുത്തനെ നിർത്തിയായിരുന്നു ചിത്രങ്ങൾ സൃഷ്ട്ടിച്ചത്.

ആകാശ ദൃശ്യത്തിലൂടെ നോക്കിയാൽ വ്യക്തമായി കാണുന്ന രീതിയിലാണ് പതാക ക്രമീകരിച്ചിരിക്കുന്നത്. ദുബൈ പ്രസ് ക്ലബ് എക്‌സിൽ അപ്‌ലോഡ് ചെയ്‌ത വിഡിയോയിൽ ദേശീയഗാനം പശ്ചാത്തലത്തിലാണ് പതാകകൾ കാണിക്കുന്നത്. ഗംഭീരമായ ഈ കലാസൃഷ്ടിക്ക് നിരവധി പേരാണ് ആശംസകൾ നേർന്നത്.

ഈ ഫ്ലാഗ് ഗാർഡൻ ദുബൈയുടെ മനോഭാവത്തെയും അതിന്റെ നേതൃത്വത്തോടുള്ള നന്ദിയെയും ക്രിയാത്മകമായി പ്രതിഫലിപ്പിക്കുന്നു എന്ന് ദുബൈ പ്രസ് ക്ലബ് അഭിപ്രായപ്പെട്ടു.

കൂടുതൽ ഗൾഫ് വാർത്തകൾ ലഭിക്കാൻ ഗ്രൂപ്പിൽ ജോയിൻ ചെയ്യുക https://chat.whatsapp.com/BRPMYfzNHhY2483Sqrze5o