കോഴിക്കോട്: വയനാട് സി.പി.എം ജില്ലാ സെക്രട്ടറി സി.ഭാസ്‌കരന്‍ (66) അന്തരിച്ചു. കരള്‍ രോഗത്തെ തുടര്‍ന്ന് ഇദ്ദേഹം ചികില്‍സയിലായിരുന്നു. ആഗസ്ത് 17 മുതല്‍ ഇദ്ദേഹം കോഴിക്കോട്ടെ സ്വകാര്യ ആശുപത്രിയില്‍ ചികില്‍സയിലായിരുന്നു. രാവിലെയായിരുന്നു അന്ത്യം.

കല്‍പ്പറ്റയില്‍ നിന്ന് നിയമസഭാ തെരഞ്ഞെടുപ്പില്‍ സ്ഥാനാര്‍ഥി ആയപ്പോഴാണ് ഭാസ്‌കരന്‍ ജില്ലാ സെക്രട്ടറിയായി ചുമതലയേറ്റത്. 1995 മുതല്‍ സി.ഐ.ടി.യു വയനാട് ജില്ലാ സെക്രട്ടറി കൂടിയായിരുന്നു ഇദ്ദേഹം.

1950 മാര്‍ച്ച് എട്ടിനാണ് ജനനം. കോഴിക്കോട് നന്മണ്ട ചീക്കിലോട് പരേതനായ കുഞ്ഞിരാമന്‍ നായര്‍, ഉണിച്ചിരി എന്നിവരാണ് മാതാപിതാക്കള്‍. വിദ്യാഭ്യാസത്തിനു ശേഷം തൊഴിലാളിയായി വയനാട്ടിലെത്തിയ ഇദ്ദേഹം കോട്ടക്കുന്നിലായിരുന്നു താമസം. ബത്തേരി കേന്ദ്രീകരിച്ചാണ് പാര്‍ട്ടിപ്രവര്‍ത്തനം നടത്തിയിരുന്നത്.