ഇനി വാട്‌സ്ആപ്പ് ചാനലുകളിലും വോട്ടെടുപ്പ് നടത്താം

ഉപയോക്താക്കള്‍ക്ക് സൗകര്യപ്രദമായ ഫീച്ചര്‍ അവതരിപ്പിക്കുന്ന തിരക്കിലാണ് പ്രമുഖ ഇന്‍സ്റ്റന്റ് മെസേജിങ് ആപ്പായ വാട്‌സ്ആപ്പ്. ഈ അടുത്തിടെയാണ് വാട്‌സ്ആപ്പ് ചാനല്‍ അവതരിപ്പിച്ചത്. ഇനി വാട്‌സ്ആപ്പ് ചാനലില്‍ വോട്ടിങ് ഓപ്ഷന്‍ കൂടി അവതരിപ്പിക്കാനൊരുങ്ങുന്നതായി റിപ്പോര്‍ട്ട്.

ചാനലുകളില്‍ പോള്‍സ് ഷെയര്‍ ചെയ്തുകഴിഞ്ഞാല്‍ ചാനല്‍ ഫോളോ ചെയ്യുന്ന ആളുകള്‍ക്ക് വോട്ട് ചെയ്യാന്‍ സാധിക്കും. ഈ ഫീച്ചര്‍ ചാനല്‍ അഡ്മിന്‍മാരും ഫോളോവേഴ്‌സും തമ്മിലുള്ള ആശയവിനിമയം മെച്ചപ്പെടുത്തുന്നതിന് സഹായിക്കും. വാട്‌സ്ആപ്പുമായി ബന്ധപ്പെട്ട വിവരങ്ങള്‍ റിപ്പോര്‍ട്ട് ചെയ്യുന്ന വാബെറ്റഇന്‍ഫോയുടെ റിപ്പോര്‍ട്ട് അനുസരിച്ച് ചാനലുകളില്‍ പോള്‍സ് ഷെയര്‍ ചെയ്യാനുള്ള ഫീച്ചര്‍ വാട്‌സ്ആപ്പ് തയ്യാറാക്കുകയാണ്. ഈ ഫീച്ചര്‍ എപ്പോഴായിരിക്കും ബീറ്റ വേര്‍ഷനില്‍ പരീക്ഷണത്തിനായി എത്തിക്കുക എന്ന കാര്യം വ്യക്തമായിട്ടില്ല.

സ്വകാര്യത ഉറപ്പ് വരുത്തുന്ന രീതിയില്‍ പോള്‍സിലെ വോട്ടുകള്‍ പ്രൊട്ടക്റ്റ് ചെയ്യപ്പെടുമെന്നും റിപ്പോര്‍ട്ടില്‍ പറയുന്നുണ്ട്. മറ്റൊരാളുടെ വോട്ടിന്റെ വിവരങ്ങള്‍ നമുക്ക് കാണാന്‍ സാധിക്കില്ല. നിങ്ങള്‍ വോട്ട് ചെയ്താലും ചാനല്‍ ഉടമയ്‌ക്കോ മറ്റുള്ള ആളുകള്‍ക്കോ നിങ്ങളുടെ ഫോണ്‍ നമ്പര്‍ കാണാനാകില്ല.