കാബൂള്‍: മുന്‍ അഫ്ഗാന്‍ വൈസ് പ്രസിഡന്റും കുപ്രസിദ്ധ യുദ്ധപ്രഭുവുമായിരുന്ന അബ്ദുല്‍ റഷീദ് ദോസ്തമിന്റെ കാബൂളിലെ ആഡംബര സൗധം പിടിച്ചെടുത്ത് താലിബാന്‍ സേന. സൈനികര്‍ ഇതിനകത്ത് സോഫയിലിരിക്കുന്നതും പുറത്തുകാവല്‍ നില്‍ക്കുന്നതുമായ ഫോട്ടോകള്‍ പുറത്തുവന്നിട്ടുണ്ട്.
താലിബാന്റെ ശക്തരായ കമാന്‍ഡര്‍മാരിലൊരാളായ ഖാരിഅ് സലാഹുദ്ദീന്‍ അയ്യൂബിയുടെ സുരക്ഷാ ചുമതലയുള്ള 150 അംഗ സേനയാണ് ഈ ബംഗ്ലാവ് പിടിച്ചെടുത്തത്. അതേസമയം തങ്ങള്‍ ആഡംബരജീവിതം ഇഷ്ടപ്പെടുന്നില്ലെന്ന് അയ്യൂബി വാര്‍ത്താ ഏജന്‍സിയോടു പറഞ്ഞു.
2001ല്‍ 2000ത്തിലേറെ താലിബാനികളെ കണ്ടെയിനറിലടച്ച് മരുഭൂമിയിലെ കൊടുംചൂടില്‍ കൂട്ടക്കൊല ചെയ്ത് കുപ്രസിദ്ധി നേടിയയാളാണ് റഷീദ് ദോസ്തം.
താലിബാനെ നേരിടാന്‍ സര്‍ക്കാര്‍ സേനയെ സഹായിക്കുമെന്നു പറഞ്ഞിരുന്ന ഇദ്ദേഹം താലിബാന്‍ സേന പ്രവിശ്യകള്‍ ഓരോന്നായി പിടിച്ചടക്കിയതോടെ ഉസ്‌ബെകിസ്ഥാനിലേക്കു രക്ഷപ്പെടുകയായിരുന്നു.